भांगरभूंय | प्रतिनिधी
ब्रिटन, खबरां संस्था ः सध्या दर वर्सा सुमार 1 लाख 30 हजार भारतीय विद्यार्थी ग्रॅज्युएशन व्हिसा मार्गांतल्यान ब्रिटनांत प्रवेश घेतात. कपात जाले उपरांत फकत 39 हजार भारतीय विद्यार्थ्यांक व्हिसा दितले. जाल्यार 91 हजार भारतीयांचो प्रवेश बंद जातलो. 2021 वर्सा सुरू केल्ल्या ग्रॅज्युएशन व्हिसा मार्गांतल्यान भारतीय आनी हेर आंतरराष्ट्रीय विद्यार्थ्यांक पदव्युत्तर शिक्षण पुराय केल्या उपरांत दोन वर्सां ब्रिटनांत रावपाक आनी काम करपाक मेळटा.
तीन वर्सांत 6 लाख विद्यार्थ्यांक प्रवेश मेळ्ळो. आतां वर्साक 2 लाख कोटी रुपया मेळप बंद जातले अशें आदले शिक्षण मंत्री निक्की मॉर्गन सांगता. हाचो अर्थवेवस्थेचेरूय परिणाम जातलो. सेंट अँड्र्यूज विद्यापिठाची कुलगुरू सॅली मॅपस्टोन हांणी सांगलें, वैजकी-अभियांत्रिकी नोकऱ्यांनी भारतीय विद्यार्थ्यांचें व्हड योगदान आसा.
ब्रिटनाचें ऋषि सुनक सरकार भारतीय विद्यार्थ्यांक व्हडलो धक्को दिवपाची तयारी करता. सरकाराच्या स्थलांतर सल्लागार समितीन सत्ताधारी कंझर्व्हेटिव्ह पक्षाच्या विचार मंडळा वांगडा ग्रॅज्युएट व्हिसा मार्ग बंद करपा विशीं अहवाल तयार केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
