ब्रिटनांत गर्भाशय प्रत्यारोपणा वरवीं जल्मलें पयलें भुरगें
भांगरभूंय | प्रतिनिधी
लंडन, खबरां संस्था ः ब्रिटनांतले एके बायलेन प्रत्यारोपण केल्ल्या गर्भाशयां वरवीं एका भुरग्याक जल्म दिला. ब्रिटनांत पयलेच खेपे अशें घडलां. आवय ग्रेस डेव्हिडसन हिचो जल्म निश्क्रिय गर्भाशया सयत जाल्लो. 2023 वर्सा ग्रेसाक तिच्या भयणीचो गर्भाशय दिल्लो. ब्रिटनांत हें पयलें येसस्वी गर्भाशय प्रत्यारोपण आशिल्लें.
बीबीसीच्या खबरां प्रमाण, ह्या शस्त्रक्रियेच्या दोन वर्सां उपरांत फेब्रुवारी 2025 त 36 वर्सां पिरायेच्या ग्रेसान तिच्या पयल्या भुरग्याक जल्म दिलो. ग्रेस आनी तिचो घोव अँगस (37) हांणी आपले चलयेक एमी अशें नांव दिलां. भुरग्याची आवय ग्रेस हिका आपलो गर्भाशय दान केल्ल्या भयणीचेंय नांव एमी आशिल्लें.
2014 वर्सा स्विडनांत प्रत्यारोपण केल्ल्या गर्भाशयांतल्यान पयलें भुरगें जल्मलें. तेन्नासावन 12 परस चड देशांनी 135 परस चड गर्भाशय प्रत्यारोपण जाल्यात. हातूंत अमेरिका, चीन, फ्रांस, जर्मनी, भारत आनी तुर्की हांचो आस्पाव जाता. ते वरवीं सुमार 65 भुरगीं जल्माक आयल्यात.
व्हडले भयणीन गर्भाशय दान करपाची इत्सा उक्तायिल्ली…
ग्रेसान 2018 त पयले फावटीं आवय जावपाची इत्सा उक्तायिल्ली. सुरवेक तिच्या आवयन आपलो गर्भाशय दान करपाचो विचार केल्लो. पूण वैजकी तपासणेंत तें योग्य थारूंक ना. उपरांत ग्रेसाची व्हडली भयण एमी पार्डीन आपलो गर्भाशय दान करपाची इत्सा उक्तायली. एमी पयलींच दोन भुरग्यांची आवय आशिल्ली आनी तिका आनीक भुरगीं नाका आशिल्ली. ग्रेस आनी एमी दोगांयनी समुपदेशन घेतलें आनी मानसीक आनी भावनीक रितीन तयारी केली.
कोवीड महामारीक लागून ग्रेसाची प्रत्यारोपणाची शस्त्रक्रिया 2019 वर्सा सावन फुडें धुकलिल्ली. निमाणे फेब्रुवारी 2023 त सर्जन डॉ. इसाबेल क्विरोगा हांच्या फुडारपणा खाला वैजकी पंगडान ऑक्सफर्डांतल्या चर्चिल हॉस्पिटलांत 17 वरांची शस्त्रक्रिया केली. 30 परस चड शस्त्रक्रिया वैज आनी तज्ञांनी एकठांय येवन एमीचो गर्भाशय काडून ग्रेसाच्या आंगांत प्रत्यारोपण केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
