ब्रिक्साच्या 10 राश्ट्रांनी केलो पहलगाम आतंकवादी हल्ल्याचो खर निशेध

भांगरभूंय | प्रतिनिधी

भारता कडेन 12 व्या ब्रिक्स संसदीय मंचाचे अध्यक्षपद

नवी दिल्ली, खबरां संस्था ः ब्राझीलांतल्या ब्राझीलिया शारांत 4 आनी 5 जूनाक 11व्या ब्रिक्स संसदीय मंचाची बसका जाली. हातूंत भारता सयत सगळ्या 10 वांगडी देशांच्या संसदेचें प्रतिनिधी हाजीर आशिल्ले. वरिश्ठ संसदीय प्रतिनिधी सयत भारतीय शिश्टमंडळाचें फुडारपण लोकसभा अध्यक्ष ओम बिर्ला हांणी केलें.
भारत, ब्राझील, रशिया, चीन, दक्षीण आफ्रिका, इराण, संयुक्त अरब अमिराती, इजिप्त, इथिओपिया आनी इंडोनेशिया ह्या 10 ब्रिक्स राष्ट्रांनी ह्या वर्सा ह्या मंचाचेर वांटो घेतलो. ह्या देशांतल्या संसदीय प्रतिनिधींनी हे परिशदेंत सक्रीयपणान वांटो घेतलो आनी संयुक्त घोशणापत्री मांडावळ करपाक म्हत्वाची भुमिका साकारली.

एआयचो जापसालदारपणान वापर, संवसारीक वेपार आनी अर्थवेवस्था, आंतरसंसदीय सहकार्य, संवसारीक शांतताय आनी सुरक्षा ह्या सारक्या मुखेल विशयांचेर चर्चा आनी विचाराच्या जायत्या फेरयां उपरांत सामुहीक एकमत जालें.
भारतान मांडिल्ल्या प्रस्नांक व्यापक तेंको मेळ्ळो आनी निमाणे संयुक्त घोशणापत्रांत तांचो एकमतान आस्पाव केलो. भारताचें आतंकवादा आडच्या धोरणाची खासा दखल घेतली. भारतान सगळ्या प्रकारच्या आतंकवादी हल्ल्याचो खर निशेध केलो आनी ‘आतंकवादाचेर शून्य सहनशीलताय’ हें धोरण आपणावपाची खर मागणी केली.

भारतांतल्या पहलगाम हांगा जाल्ल्या आतंकवादी हल्ल्याचो संयुक्त घोशणापत्रांत खर निशेध केलो आनी वांगडी देशांनी आतंकवादाच्या विरोधांत एकठांय काम करपाक मान्यताय दिली. आतंकवादी संघटनांक अर्थीक आदार दिवपाचेर आळाबंदा हाडप, गुप्तचर म्हायतीची देवाण-घेवाण वाडोवप, नव्या तंत्रगिन्यानाचो गैरवापर आडावप, तपास आनी न्यायालयीन प्रक्रियेंत सहकार्य वाडोवपाची गरज ओम बिर्ला हांणी उक्तायली.
भारताचो दृश्टीकोन आनी फुडारपण खासा लक्षांत घेतलें आनी संवसारीक शांतताय आनी सुरक्षे खातीर सगळ्या वांगडी देशांचो सक्रीय सहभाग गरजेचो अशें ब्रिक्स संसदांनी मान्य केलें. फुडल्या वर्सा जावपी बाराव्या ब्रिक्स संसदीय मंचाचे आयोजन करपाची जापसालदारकी भारताक दिली. लोकसभेचे अध्यक्ष ओम बिर्ला हांकां ह्या मंचाचे अध्यक्षपद औपचारीकपणान सोंपयिल्लें.