भांगरभूंय | प्रतिनिधी
मिनास गेरायस, खबरां संस्था: ब्राझीलाक बस आनी ट्रका मदीं जाल्ल्या अपघातांत ३८ जाणांक मरण आयलें. मिनास गेरायसच्या तेओफिलो ओटोनी शारा लागसारा हो अपघात घडलो.
हे विशीं चड म्हायती प्रमाण, ह्या अपघातांत १३ लोक जखमी जाल्यात. तांकां थळाव्या हॉस्पिटलांत दाखल केल्यात. ही बस साओ पाउलो हांगच्यान भायर सरिल्ली आनी तातूंत ४५ प्रवासी आशिल्ले. ह्या अपघातांत एके गाडयेचोय धपको बसीक बसलो. मात तातूंत प्रवास करपी प्रवाश्यांक कांय जावंक ना.
अपघाताचें कारण : बसीचे टायर फुटले
बसीचे टायर फुटिल्ल्यान चालकाचें बसीवेलें नियंत्रण सुटलें आनी बस ट्रकार आदळिल्ल्याचें आशिकुशीकच्या लोकांनी सांगलें. तेन्नाच एक व्हड फातर (ग्रॅनाइट ब्लॉक) बसीक आदळ्ळो. अपघाताचीं नेमकीं कारणां कितें हाचो तपास पुलीस करतात.
ब्राझीलच्या येरादारी मंत्रालयाच्या म्हणण्या प्रमाण, २०२४त आतां मेरेन १०,००० परस चड लोकांनी रस्तो अपघातांत आपलो जीव होगडायला.
सप्टेंबरांत ब्राझीलच्या फुटबॉल खेळगड्यांक घेवन वचपी बस उमथल्ल्यान तिगांक मरण आयलें. ते बसींत बशिल्लो कॉरिटिबा क्रोकोडाइल्स संघ रिओ दि जानेरो हांगा जावपी चॅम्पियनशिपींत वांटेकार जावपाचे आशिल्ले. अपघाता उपरांत ही मॅच रद्द जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
