भांगरभूंय | प्रतिनिधी
वाळपय: ब्रह्म वृद्धांच्या महारुद्रनुष्ठान मंत्रघोषांतल्यान गोंयांतल्या एकसुऱ्या सत्तरी म्हालांतल्या ब्रह्माकरमळी गांवांतल्या श्रीब्रह्मदेव देवस्थानाच्या ब्रह्मोत्सवाक काल सकाळ सावन उर्बे उमेदीन सुरवात जाली. मंगलमय वातावरणांत सकाळ सावन ते रातीं उसरां मेरेन व्हड प्रमाणांत भाविकांनी लाव घेतलो. ह्या वेळार देवस्थान समितीचे वतीन तयार केल्ल्या दिग्दर्शिकेचें मानेस्तांचे हाजिरेंत प्रकाशन केलें.
गोंयांत एकसुरें आशिल्ल्या श्रीब्रह्मदेव देवस्थानाचो ब्रह्मोत्सव 17 डिसेंबर सावन सुरू जावन तो 19 डिसेंबर मेरेन मनयतले. सकाळीं देवस्थानाच्या सभामंडपांत ब्रह्म वृद्धांच्या महारुद्राष्टांत मंत्रघोशांतल्यान सुरवात केली. दनपारां बारा वरां मेरेन मंत्रघोष सुरू आशिल्लो. उपरांत भौशीक आरती केले उपरांत दनपारां महाप्रसाद जालो. ह्या महाप्रसादाचो शेंकड्यांनी भाविकांनी लाव घेतलो.
सकाळीं ते रातीं उसरां मेरेन भावीक व्हड प्रमाणांत देवदर्शना खातीर गर्दी करीत आशिल्ल्याचें पळोवंक मेळ्ळें. फाटल्या शेंकड्यांनी वर्सां सावन ह्या देवस्थानाचो आयोजीत जावपी ब्रह्मोत्सवाक एक वेगळी परंपरा आसा. ह्या परंपरेच्या माध्यमांतल्यान ह्या उत्सवाक एक वेगळ्या प्रकराची नामना मेळ्ळ्या. गोंय, महाराष्ट्र, कर्नाटक वाठारांतल्यान भावीक ब्रह्मदेवाच्या दर्शना खातीर येत आसतात. हाका लागून तीन दीस चलपी ब्रह्मोत्सव हो एक प्रकारचो ईश्वरी भक्तीचोमेळ आशिल्ल्याचें समजतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
