भांगरभूंय | प्रतिनिधी
वाळपय: वाळपय वनविभाग आनी ब्रह्मकरमळी ग्रामस्थांनी एकठांय येवन पर्यावरणपूरक उपक्रमा खातीर जिणेशैली खाला नितळसाण मोहीम आनी झाडां रोवपाची कार्यावळ राबयली.
वाळपयच्या वनविभागान ब्रह्मकरमळी ग्रामस्थांच्या सहकार्यान ब्रह्मदेव मंदिरा लागसारा ब्रह्मकरमळी झर्यार नितळसाण मोहीम आनी झाडां रोवपाचो उपक्रम राबयलो. हो उपक्रम पर्यावरणाच्या उपक्रमा खातीर जिणेशैलीचो एक भाग. जाचो हेतू संसाधनांच्या जाणीवपूर्वक वापराचेर लक्ष केंद्रीत करपी जिणेशैली वाडोवपाचो आसा आनी सद्याच्यो ‘वापर आनी विलो लावप’ संवय बदलपा खातीर आसा. ह्या वेळार सैमाची राखण करपाचो सोपूत सगळ्या पदाधिकार्यांनी घेतलो.
हवामान बदलपाक योगदान दिवंक शकता अशे दिसपट्टे जिणेंत सादे बदल आपणावपाक व्यक्तींक उर्बा दिवप हो ह्या उपक्रमाचो मुखेल हेत आसा. वाळपय वनविभाग आनी ब्रह्मकरमळी ग्रामस्थांनी ह्या वाठारांत वखदी वनस्पत लावपा खातीर फुडाकार घेतला. जाका लागून हो वाठार सोबीत जावपाक मजत जातली. तशेंच भलायकेचे नदरेन उर्बा मेळटली.
नितळसाण मोहिमे खाला स्वयंसेवकांनी ह्या वाठारांत साचिल्लो कोयर एकठांय केलो. झाडां रोवपाच्या उपक्रमांत स्वयंसेवकांनी विवीध तरेच्या वखदी वनस्पतींची लागवड केली. नव्याच लायिल्ल्या रोप्यांची जतनाय कशी घेवप हाचें प्रशिक्षण ह्या वेळार हाजीर आशिल्ल्या सगळ्यांक दिलें.
वाळपय वनविभागाच्या प्रवक्त्यान म्हायती दितना सांगलें, लोकांक फायद्याची जिणेशैली आपणावपा खातीर उर्बा दिवची. पर्यावरणांत सकारात्मक बदल घडोवन हाडप हो ह्या उपक्रमाचो उद्देश आसा. ब्रह्मकरमळी ग्रामस्थांनी वांटो घेतिल्ले खातीर आमी ताचे उपकारी आसात, अशेञ तांणी म्हणलें.
ह्या वेळार वनाधिकारी दत्तराज शिरोडकार दरेकल्यान सैमाचे सैवे खातीर पावल उबारचें आनी आमकां सहकार्य करचें असो उलो तांणी मारलो.
अधिकारी शाम केरकार हांणीय ह्या वेळार अपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
