भांगरभूंय | प्रतिनिधी
सरकार आखतलें खासा धोरण
पणजी : कुशळटाय प्रशिक्षण चांचणी घेवन बौद्धीक दिव्यांगांक धावी, बारावी समकक्ष प्रमाणपत्रां दिवपाचो प्रस्ताव आसा. पदवीका तशेंच पद्वी प्रमाणपत्रां लेगीत दिवपाचो विचार आसा. अशीं प्रमाणपत्रां दिवपी गोंय हें पयले राज्य थारतलें, अशें मुख्यमंत्री डॉ. प्रमोद सावंत हांणी म्हणलें. पर्पल फेस्टा विशीं उलयतना तांणी ही म्हायती दिली.
दिव्यांगां खातीर नोकरेंत ४ टक्के आरक्षण आसा. प्रमाणपत्रां नाशिल्ल्यान तांकां नोकरे खातीर अर्ज करपाक आडखळी येतात. ही आडखळ पयस करपाक बौद्धीक दिव्यांगांक प्रमाणपत्रां दिवपाचो विचार आसा. सरकार ह्या विशयाचेर शिक्षण खातें, शालान्त मंडळ तशेंच शिक्षण संस्थां कडेन चर्चा करतलें. हेर राज्यांतल्या शालान्त मंडळां कडेन लेगीत चर्चा करून हे विशी धोरण तयार करतलें, अशें मुख्यमंत्र्यांनी सांगलें.
संजय स्कूल तशेंच हेर संस्थांनी दिव्यांग भुरगीं शिक्षण घेतात. विवीध कलाकसुरीच्यो वस्तू तयार करपा सयत तीं कुशळटायेचे प्रशीक्षण घेतात. तांकां प्रमाणपत्रां दिल्यार सरकारीच न्हय जाल्यार खासगी नोकर्यां खातीर लेगीत अर्ज करप शक्य जातलें. राष्ट्रीय शिक्षण धोरणांत लेगीत दिव्यांग विद्यार्थ्यांच्या शिक्षणा संबंदी खासा तजवीज आसा. दिव्यांग विद्यार्थी जें प्रशीक्षण वा शिक्षण घेतात, तांचो तांकां लाव जावपाक जाय. करीयर करप शक्य जावपाक जाय. हाचे खातीर प्रमाणपत्रां दिवप पुरक थारतलें.
२५० दिव्यांगांक खाजगी आस्थापनांनी नोकरी
दिव्यांगांक नोकरी दिवपी खाजगी आस्थापनां खातीर सरकाराच्यो खासा सवलती आसात. आतां मेरेन २५० दिव्यांगांक खासगी आस्थापनांनी नोकरी मेळ्ळ्या. दिव्यांगांक नोकरी दिवची म्हूण खासगी आस्थापनांकडेन सरकार चर्चा करतलें. पर्पल फेस्ट करीयर, रोजगार तशेच नोकर्यो मेळपा खातीर लेगीत लावकारी थारता, अशी म्हायती मुख्यमंत्री डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
