भांगरभूंय | प्रतिनिधी
कांय वर्सां फाटीं जॉन डिसिल्वा हाचो ‘बोवाळ’ नांवाचो तियात्र चलतालो. एक अस्तुरी (त्या तियात्रांतलो एक
अभिनय) बोवाळ करून कशे तरेन समाजांत आपलीच प्रतिमा इबाडटा तें ताणीं दाखळ केल्लें. हो जालो एके तरेचो बोवाळ. आयच्या समाजांतूय बोवाळाक खूब म्हत्व वाडलां. हांव आमच्या गोंयांत चलतल्या एके तरेच्या बोवाळाची खबर करतां, अशें तुमकां घडिये दिसत. तो आनी एके तरेचो बोवाळ. बोवाळ म्हणटना अनितीआड मोर्चा काडप, जाहीर सभा घेवप असले बोवाळ आयज जाय, कित्याक अनीत आदारतल्यांक शेवटाक हीच भास समजता. पूण हांव खबर करतां ती मात, जिणेंतल्या बोवाळाची.
आयज आमच्या मदल्या जायत्या जणांक बोवाळ केल्यार आमी जिखतले अशें दिसता. बोवाळांतल्यान आमकां यश मेळूंक शकता, अशेंय आमचें मत. पूण, हें यश मात बोवाळा पुरतेंच बोवाळांत विरगळटा. हें आमकां सत मांनून घेवंक कठीण लागता. ह्या यशाची वाट पळेवन बसपी आमी तातपुरते खुशालकायेचे गुलाम जातात. तर असले खुशालकायेंत आमी रावंचें काय?
आमी बोवाळ केन्ना करतात हाचेर आमचें लक्ष ओडूया. बोवाळ केल्यार कोणाक फायदो आनी कोणाक नुकसाण जाता हेंवूय गरजेचें.
(1) आमकां वेगींवेगीं जाप जाय.
आमी आयज एका विचित्र कश्या संवसारांत जियेतात. बटन मारल्यार ‘लायट’ पेटूंक जाय, असलें आमचें धोरण. आयज आमकां सगळेंच ‘फास्ट’ जाय. असले परिस्थितिंत सोसणिकायेक आमचे जिणेंत सुवात ना. बोवाळाचे भकीक पडून तरी आमकां जाप मेळतली म्हूण आमी बोवाळ चालू दवरतात.
(2) चिंतपाची शक्ती उणी पडटा.
आयज थोडो वेळ ओगेपणीं सारुंक आमचे कडेन जायना वा आमकां ते खातीर वेळूय ना. चितूंक आमकां बळ आसा, पूण दूसऱ्याच्या आदारान बोवाळ केल्यार आमी जिखतात अशें दिसता. हे वरवीं चिंतपाची शक्ती आमची देंवत आसा. देखुनूच आमी बोवाळाचे गुलाम जातात.
(3) बोवाळांतले विचार खरे म्हणपाचो समज.
आमचे मदीं आनीक एक समज आसा आनी तो म्हळ्यार बोवाळांतल्यान जें कितें भायर सरता ते सारकें, ‘majority wins’’ हे वृत्तीक लागून बोवाळाक चड म्हत्व मेळटा.
(4) दुसऱ्यांकूय त्याच मापान दिवंचें.
आयज आमकां कोणेंय कितेंय सांगलें जाल्यार आमकां तें पटना आनी पटूंक जायच म्हूण ना. आमची वागणूक सारकी ना म्हूण आमचे मुखार कोणेंय हाडलें जाल्यार बोवाळ करून दुसऱ्यांचो इतिहास वयर काडूंक आमी फाटीं रावनांत.
ह्या वयल्या कारणांक लागून आमी बोवाळाक घडिये चड महत्व दितात जायत, पूण आमी आपणायल्ल्या धोरणांतल्यान आमकां जायतें नुकसाणूय जावंक शकता. बोवाळ केलो म्हणटच आमी जायतें मेळवन घेतात अशें आमकां दिसता. असल्या बोवाळांतल्यान, आमी जोडिल्लो संबंध तुटोवन उडोवंक फाटीं पडनांत. आमचेंच सारकें म्हूण दाखवंक आमी केल्लो फटीचो प्रचार आमकांच, म्हळ्यारूच आमच्या अंतस्कर्णांक खावंक लागता. आमी गुन्यांवकार जाल्ल्याचो भास आमकां जाता. खरें म्हळ्यार तातपुरत्या बोवाळाक लागून आमी आमचेंच नुकसाण करून घेतात.
हें सगळें सांगून आमचेर अनीत जाता तेन्ना आमी मोनेपणाचें सवंग घेवंचें अशें म्हाका म्हणपाचें ना. आमची चिंतपाची शक्ती आमी वाडोवंया. फावो तसलो तर्क वापरून, बोवाळ करिनासतना, सुटावे जावपी प्रस्न सुटावे केल्यार कितें वायट?
जॉन एम्. आल्फोंसो, कार्मेलीत,
लोलयें- काणकोण. मो- 7666519837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
