भांगरभूंय | प्रतिनिधी
बशींतले प्रवासी सुखरूप; देड वर येरादारी आडखळ्ळी
भांगरभूंय । प्रतिनिधी
मडगांवः बोरये टॉपकॉला बसस्टॉपाचेर एक पोरणें झाड हुमटून पडलें. ताका लागून दुचाकी चालक समाधान भीमराव (29, यमघर ढवळीमळ) गंभीर जखमी जालो. कुशीचे एके प्रवासी बशीचेर तें झाड आडकून उरलें. झाड लायटीच्या सरयांचेर पडिल्ल्यान सरयो तुटून जमनीचेर पडल्यो. वीज कर्मचारी वाहन चालक तुळशीदास बोरकार हांणी वेळकाळ वळखून वीज प्रवाह बंद केल्ल्यान जखमी दुचाकी चालक आनी बशींतले प्रवासी बरे भशेन वाटावले.
उजो पालोवपी दळाच्या कर्मचाऱ्यांनी पडिल्लें झाड कुशीक काडून येरादारीक रस्तो मेकळो करून दिलो. ह्या वेळार थळावे पंच विनय पारपती आनी सरपंच दुमिंग वाझ थंय हाजीर आशिल्ले. टॉपकोला जंक्सन रुंदीकरणाचो थाराव पंचायतीचे पयले बसकेंत घेतला, अशी म्हायती सरपंच वाझ आनी सचीव कपील नायक हांणी दिली. तांणी बायथकोल ते श्री सिमेशेवर आनी बोरी पुला मेरेन पळोवणी केली. येरादारीक आडखळ करपी सुमार 40 ते 45 झाडां मारपाचो निर्णय घेतला, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
