भांगरभूंय | प्रतिनिधी
फोंडें: बोरयेच्या पॅट्रोल पंप लागसार प्रवासी बस आनी स्कुटर हांचे मदीं जाल्ल्या अपघातांत मनोज देसाय (३८, नवदुर्गा देवळा लागसार- बोरये) हाका आयतारा सकाळीं गोमेकॉंत उपचार सुरू आसतना मरण आयलें. शेनवारा दनपरां ४ वरांचेर हो आपघात जालो. फोंडें पुलिसांनी अपघाताचो पंचनामो केल्लो.
फोंडें पुलिसांनी दिल्ले म्हायती प्रमाण, जीए -०२-टी -४८५२ नंबराची प्रवासी बस फोंडेंच्यान सांवड्ड्यां वताली. बोरयेच्या पेट्रोल पंपा लागसार पावतांच विरुद्ध दिकेन येवपी जीए-०५-क्यू -५७८५ नंबराचे स्कुटराचो प्रवासी बसी सामकार बरोच नेटान धपको बसलो. हातूंत स्कुटर चालक मनोज देसाय हो गंभीर जखमी जालो. जखमीक १०८ ऍम्बुलन्सींतल्यान शिरोड्यां मुळाव्या भलायकी केंद्रांत दाखल केलो. रातचें उसरां अदीक उपचारा खातीर जखमीक मडगांवां हॉस्पिटलांत व्हेलो. उपरांत मध्यानरातीं ताका गोमेकॉंत धाडलो. थंय ताका उपचारा मजगतीं मरण आयलें.
फोंडें पुलीस निरीक्षक मोहन गावडे हांच्या मार्गदर्शनाखाला उपनिरीक्षक आशिष वेळीप आनी हवालदार रामदास गावडे हांणी अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
