भांगरभूंय | प्रतिनिधी
दिगूची काणी कानार घालचे पयलीं तागेल्या फामिलीची म्हायती तुमकां सांगतां. बोरकारांचे नीजगांव फोंडें तालुक्यांतले बोरी. थंय अजूनय तांचे सोयरे-धायरे रावतात. थंयचे ते भाटकार. दिगूच्या आज्यान पणजे लिसेव केलां. फुडल्या जिवितांत भारतकार म्हणून ख्यातकीर्ती मेळयिल्ले हेगडे देसाय तांचे लिसेवांत वांगडी. या हेगडे देसायान फुडे फार्मासिस्ट आनी आदोगासी करपाची डिग्री मेळयली. पूण जिवितांत तो एक ज्वलंत पत्रकार म्हूण फामाद जालो. दिगूचो आजो मंगेश बोरकार ताचे इतलें शिकूंक पावलोना. चार वर्सां लिसेवांत काडून तो पुर्तुगेज शासनांत एम्प्रेगाद जालो. ताका रस्ते आनी पूल बांदपाच्या विभागांत नोकरी मेळिल्ली. थंय ताका कंत्राटदाराचें काम. बाकी बारीकसारीक गजाली ताणें पारखिल्ल्यो. तो मागीर आपूणच ल्हान- व्हड कंत्राटां घेवपाक लागलो आनी ल्हवू ल्हवू ताची बांदकाम विश्वांतलो विश्वासू मनीस अशी ख्याती झाली. रस्ते आनी पूल बांदप तागेलो हातखंडो वेव्हार. तातूंत ताणें खूब पयसो केलो आनी तेन्नाच उदरगतीक येत आशिल्ल्या वास्कोंत कमी मोलांत मेळिल्ल्या जार्दीना लागच्या जमनीच्या कुडक्यार दोन मजली घर बांदलें.
ताणें बांदिल्लें घर तशें व्हड. ताणें नदरे मुखार मडगांवां- बड्ड्या पुर्तुगेज बांदकाम धाटणेचीं घरां दवरिल्लीं. पूण तशें काम करपी गोंयांत मेळपाक कठीण आनी जे मेळटाले ते अव्वाचें सवा मोल मागताले. हे खातीर ताणें बेत बदल्लो आनी येवजणे प्रमाण घर बांदलें. फुडें व्हड वरांडो; घरा कुशीक गॅरेज, (ताचे कडेन मोटार नाशिल्ली, पुण मोटारी बाजारांत आयिल्ल्यो. फुडें घेवपाचो विचार करून ताणें गॅरेजीक जागो सोडल्लो). सकल्या मजल्यार व्हडले साल आनी जेवपा खातीर दुसरें तितलेंच व्हड साल. देवघरा खातीर स्पेशल कूड, रांदची कूड. कोठये कूड, न्हाणीघर आनी तीन न्हिदपाच्यो कुडी. तातुंतली एक दिगूचो आजो- आज्जी आनी दुसरी आवय- बापूय वापरता. तिसरे कुडींत विश्वासालें ऑफिस. वयल्या माळ्यार तितलोच जागो आशिल्ल्यान थंयसर भुरग्यांची वेवस्था केली. तागेलो मामेभाव अवधूतय थंयच रावता. येवपी वचपी सोयऱ्यांचीय वेवस्था थंय जाता. या मजल्या वेल्यान फाटल्यान आशिल्लो रेल्वे मार्ग स्पश्ट दिसता. रेल्वेची येरादारी पळयताना दिगू आनी तागेल्या ल्हान भावंडांक खूब खोस जाताली. रेल्वेमार्ग आनी बोरकारागेलें घर हाचे मदीं वणत आशिल्ली; त्या आंगणांत तरेतरेचीं फुलझाडां आनी तरेकवार भाजयांची रोवणी जाताली.
या मंगेश बोरकाराक चार भुरगीं. दोन चले, दोन चलयो, विश्वास व्हडलो, फाटल्यान दोन चलयो आनी धाकटो रामनाथ. चलयो गोंयांतल्या नामनेच्या घरांत व्हाड्डिक करून दिल्लीं. व्हडली पणजे कामत धाकणकारांची सून तर दुसरी मडगांवां नायक रायकाराली. व्हड सून हेगड्याली तर दुसरी काणकोणच्या गायतोंडे घराण्यांतली. व्हडलो पूत विश्वास ताचें काम फुडें व्हरतालो तर पुण्यांत एमए बीएड केल्लो श्रीनिवास वास्कोंत सेंट जोजेफ इंस्टिट्युटाचो हेडमास्तर आसलो. ताका इस्कोलान तांच्या वांठारांत रावपाक अल्प भाड्याचें घर दिल्लें. तर विश्वास बापायन बांदलेल्या घरांत आवय, बापाय बराबर रावतालो.
दिगू जल्मलो तेन्ना ताका तीन भुरगीं, दोन चलयो, शैला आनी वनिता तर एक चलो दत्तात्रेय (दत्ता); दिगू चवथो. ताच्या फाटल्यान दोन चले, प्रसाद आनी शंकर आनी चली रेखा. (भोवतेक लक्ष्मण रेखेवेल्यान नांव दिल्लें आसतलें अजून भुरगीं जावचीं न्ही म्हण. मस्करी केली; खरी गोश्ट म्हाका खरेंच खबर ना.) श्रीनिवासाक मात आमी दोन, आमकां चार अशे दोन चले, दोन चलयो. एकूण बोरयेच्यान वास्को शारांत रावपाक आयिल्ल्या मंगेश बोरकाराली फामिलीचे नगरांत बरे बस्थान बशिल्लें.
विश्वासाले व्हडले चली शैला, दिगू जातकर तीन वर्सांनी म्हणल्यार 1950 सालांत मॅट्रीक परिक्षा पास जाल्लें. (फाटल्यान ते परिक्षेचें नामांतर एसएससी जालें.) तेन्ना व्हडलो इंडस्ट्री (मिनाच्या धंद्याकय 1954 वर्सा, जेन्ना जपान राष्ट्र गोंयचें मीन घेवपाक लागले तेन्ना सावन बरे दीस आयले.) गोंयांत नाशिल्ल्यान चल्यांकच जेन्ना नोकरी मेळनाशिल्ली तेन्ना चलयांक मेळप म्हाकठीण, मेळ्ळी जाल्यार नर्स वा शिक्षिकेची. म्हूण शैलाबाय घरांतच ट्युशन, वीणकाम करून जोड मेळयतालें. ताच्या फाटलें वनिता णववेक तर व्हडलो भाव दत्ता निकतोच माध्यमीक इस्कोलांत गेल्लो. प्रसादाचो जल्म 1950, शंकर 1953 आनी धाकट्या रेखाचो 1956 चे.
हेडमास्तर श्रीनिवास बोरकारालो गुरूदास दिगू परस चार म्हयन्यानी व्हड. दिनूचे काणयेंत दास बोरकार आनी तांगेर रावतालो मामेभाव अवधूत हेगडो सोडल्यार दुसऱ्या चुलत वा आते वा मामेभावांक चड म्हत्व ना, म्हूण तांची हांगां म्हायती दिवंकना. चुकून गरज पडल्यार निश्चीत दितलों.फुडें चलता…
दीपक पाणंदीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
