भांगरभूंय | प्रतिनिधी
दोना पावलान निमाणी दर्यांत उडी मारून खंय आपली जीण सोंपयली. फामाद कांताराल्या प्रेमा आनी राजनाचें मात कितें जालें तें कळूंक मार्ग ना. प्रेमा दोना पाऊला भशेन संवेदनशील आशिल्लें काय?
गोवा की दोना पावला कि प्यार कि कहानी लैला- मजनू, रोमिओ- जुलिएत या हिर-रांझा जैसी है. हनिमूना निमतान दिल्ली सावन गोंय भोवंडेर आयिल्ल्या एका जुवान जोडप्याक तो हें सांगतना म्हज्या कानार पडलें. आतां ती गजाल कितली खरी आनी कितली फट हें ताका आनी म्हाका दोगुय जाणाक खबर लेगीत ना, हें तितलेंच खरें. सांगपी राजेश तिवारी मूळ बालमपूर, उत्तर प्रदेश हांगासर रावपी. थंयच तो ल्हानाचो व्हड जाल्ल्लो. शिकप अर्द्यार सोडून पोट भरुंक गोंयां पावलो. गोंय केन्नाच कोणाकुच उपाशी मारीना हें आतां मेरेन संवसारभर जाला. फाटल्या पंदरा वर्सां सावन तो कळंगुट, पणजी विंगड विंगड हॉटेलांचो “गोवा स्पेशल” गायड म्हूण काम करता. तो सांगतालो ती गजाल त्या आयकुप्यांक पडून गेल्ली लेगीत नाशिल्ली. तीं दोगां लागीं थंयच आशिल्ल्या पुतळ्या सामकार रावन सेल्फी घेवंक व्यस्त जाल्ली.
भारत देश स्वतंत्र जाल्या उपरांत पुर्तुगाली सरकारा कडसून गोंय सुटावे करूंक त्या वेळच्या भारत सरकाराक चवदा वर्सां लागलीं. ह्या मदीं कोणी गोंयकार गोंया सावन मुंबय वतलो तर ताका पासपोर्ट करचो पडटालो. काय शेंकड्या आदीं त्या जुव्यार मुंबादेवीचें देवूळ आशिल्ल्यान ताका मुंबय नांव पडलें अशें काय जाणकारांचें मत. फकत वेवसाय करूंक आयिल्ल्या पुर्तुगाली लोकांनी हो जुंवों म्हणल्यार आयची मुंबई 1534 वर्सा बळकायली. पुर्तुगाली लोकांनी मुंबयचें “बोमाय” केलें. बोमाय म्हणल्यार पुर्तुगेजींत “बरें बंदर” (माकड न्ही! ) अशें कांय जाण मानतात. उपरांत पुर्तुगाली राजकन्या कातारीन ब्रागन्झ आनी ब्रिटीश चार्ल्स- ।। हांचें दोगांयचें काजार जालें. तांच्या काजारा वेळार पुर्तुगाला कडसून ब्रिटीशांक तें जुवे दोतीत (हुंडो) मेळ्ळें. तांणी बोमायचे ‘बॉम्बे’ केलें. आज परत तें मुंबय जालां.
गोंय पुर्तुगेझाच्या शेकातळा आसतना गोंयकार लेगीत मुंबयक ‘बोमाय’ म्हणी. सुटके उपरांत गोंयकारांनी रचिल्या विंगड विंगड कातारांनी जायत्या फावट “बोमाय” हें उतर घोळटा. देखीक एम. बाॅयर आनी सोफिया हांणी गायिल्लें ‘झिला आनी लीला’ कांतार वो रेमो फर्नांडिस सांगाता अलिशा चिनाॅय हांणी गायिल्लें ‘राजन आनी प्रेमा’ कातार. ही दोनूय कांतारा आयकत तर बोमाय उतर थंय “परदेस” ह्याच अर्थान वापरलां काय, असो दुबाव येता. दोनी कांतारांतलीं मोगी बोमाय वतल्या आपल्या मोग्याचो गोंया परतुन येवपाचो हुस्को उक्तायतात. एकांतलो झिला परत येवन लीला वांगडा गोंयभर जात्रांनी भोंवपाचें थारायता. राजन मात आपल्या बाप्पान धंद्या पासत आपणाक बोमाय आपयला आनी आपुण परत येतलों काय ना तें सांगूक धजवना तरी लेगीत आयल्या उपरांत भटाक आपोवन सगळ्या गांवकारा सामकार लगीन जावपाचें उतर दिता. आपुण तू परत येता म्हणसर तुजी वाट पळेन अशें प्रेमा ताका सांगता आनी कांतार सोंपता.
हालीं सोशल मिडिया माध्यमावेलो इन्स्टाग्राम चाळटना राजन, प्रेमाच्या मोगाच्यो खबरो परत आयकूंक/ पळोवंक मेळ्ळ्यो. आनी तेन्ना म्हाका राजेश तिवारील्या त्या वेल्या उतरांची याद जाली. एक आयकीव गजाल अशी सांगता की आपलो मोगी परत येतलो म्हूण वाट पळेत राविल्ल्या दोना पावलान निमाणी दर्यांत उडी मारून खंय आपली जीण सोंपयली. फामाद कांताराल्या प्रेमा आनी राजनाचें मात कितें जालें तें कळूंक मार्ग ना. प्रेमा दोना पावला भशेन संवेदनशील आशिल्लें काय? आयचे फुडारिल्ले अस्तुरेवरीं घडिल्ले ते गजाली कडेन ताणें वेव्हारीक नदरेन पळयलें काय? काय ताणें ह्या सगळ्या फुडें पावल मारले? हें कळूंक आतां मेरेन बरोच कळाव जाला. तरी फुडें जालें तरी कितें तांचें हें सोदुन काडचेंच पडटलें.
दादा हेगडे
९५१८९४२२९८
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
