भांगरभूंय | प्रतिनिधी
आमच्या माणकुल्या गोंयांत जायत्या वाठारांनी देवचार हो जाग्याचो राखणदार गांवाची राखण करता. लोकांच्या उल्याक धांवन येता. आमचे पूर्वज जांबळ, वड, पिपळ, सांवर अश्या व्हडल्या झाडांचेर ताचें अस्तित्व आसा म्हूण दर बुधवार, आयतारा आमोरेचेर चुकनासतना तेल, तुपाचो दिवो पेटयताले. ताचे मुखार नतमस्तक जाताले.
अशेंच एक देवूळ म्हापश्यां आसा. शाराच्या मदीं पाचव्याचार शेतांत आशिल्लें देव बोडगेश्वराचें देवूळ म्हणल्यार गोंयकारांचे श्रद्धास्थान. आदल्या तेंपार एका झाडाच्या मुळांत बोडगेश्वराची मुर्ती आशिल्ली. कालांतरान ते वास्तुचें व्हडल्या देवळांत रुपांतर जालें. सभामंडप आनी तातूंत आनीकय ल्हान देवळ्यो बांदल्यात. मदोमद एक व्हडलें झाड आनी तांच्या कुशीकूच बोडगेश्वराची सुंदर, तेजस्वी, धिप्पाड संगमरवरी मुर्त. तिचें आकर्शक रुप. माथ्याक व्हडलो फेटो, खांद्यार भरजरी शाल, पिळदार पिश्यो, धोतर, हातांत भांगराचो दांडो आनी दुसऱ्या हातांत मशाल. ताच्या दोळ्यांतली चमक पळयत रावनशी दिसता. सभामंटपांतल्या खांब्यांचें नक्षीकाम, देवतेंच्यो मुर्ती मनाक भुरळ घालतात. हांगा वर्सयभर शेंकड्यांनी विधी जातात. सत्यनारायण महापूजा जातात. भाविक केळीं, नाल्ल, उजवाती, फुलांचो हार देवाक अर्पण करतात. आपल्या उद्देग, धंद्या विशीं आंगवण करतात. आपलें दुख्ख देवाक सांगतात. गाराणें घालतात. संकश्ट टाळपाक धावून यो, म्हणटात.
जात्रेच्या दिसा भायल्या वाठारांत मिठाय, आयदनां, खेळणी, कपडे, साडयो विकपी दुकानां लागतात. फुलां, उजवाती, नाल्लाचीं दुकानां दिसतात. देवाच्या दर्शनाक आयिल्ले भावीक देवाच्या पायां कडली म्हूण एक तरी वस्तू विकत घेतातूच. भाविकांची देवा विशीं आशिल्ली भक्ती, आस्था दिसता. एका तेंपार ही जात्रा फक्त दोन दिसांचीच आसताली. मात, आतां एक- एक दीस वाडून ती पांच दिसांचेर पावल्या. फेरीय तितले दीस आसता. हांगा सत्यनारायण पुजेक, म्हाप्रसादाक लोक येतात. प्रसाद खावन तृप्त जातात.
जायते लोक आपलो वेवसाय, पूत- धुवेचें लग्न जुळोवपाक हांगा येतात. सोयरीगती करपाचें देवूळ म्हूण ह्या देवळाक पयलीं सावन लोकप्रीयता आसा. हांगां सोयरीक केल्ल्या व्हंकलांचीं लग्नां रोखडीच जुळटात. तांचो संवसार सुखाचो जाता. देव भक्तांच्या उल्याक धांवून येता. तांचीं संकश्टां पयस करता. देवाच्या गांवकारान घाल्लें गाराणें इतलें जबरदस्त आसता की तें आयकन रावन कशें दिसता. हें देवस्थान सामकें जागृत.
अशा ह्या राखणदार बोडगेश्वराक, भक्तांच्या उल्याक पावपी, आंगवणी आयकुपी, शेणिल्ल्यांक मशालीच्या उजवाडांत वाट दाखोवपी संकटमोचन बोडगेश्वराक कोटी कोटी नमस्कार.
बोडगेश्वरा राखणदारा
तुं सगल्यांचो पालनहारा
भक्तांच्या उल्याक धांवून येता
ताचें संकश्ट विघ्न पयस करता
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
