बोडगेश्वराचे जात्रेंतल्या जायंट व्हिलांक सील

भांगरभूंय | प्रतिनिधी

मामलेदार कार्यालया कडल्यान सुरक्षा परवाने नाशिल्ल्यान कारवाय

भांगरभूंय । प्रतिनिधी

म्हापशें : म्हापश्यां श्रीदेव बोडगेश्वराचे जात्रेंत उबारिल्लें जायंट ह्वील आनी हेर मनरिजवण रायड्साचीं संरचना बार्देस देवळां प्रशासक कार्यालया कडल्यान सील केल्यांत. जात्रेचे सुवातेर उबारिल्ल्या ह्या संरचनांक सरकारी यंत्रणांची गरजचो नाहरकत दाखलो आनी सुरक्षा परवाने नाशिल्ल्यान ही कारवाय केल्या. ताका लागून अंदूं ल्हान भुरग्यांक तशेंच युवा वर्गाक जायंट व्हील तशेंच हेर मनरिजवण रायड्सांचो घोस्त काडपाक मेळचो ना.

बार्देस मामलेदार कार्यालयाच्या दोन पंगडांनी बिरेस्तारा दनपारां जायंट व्हील आनी हेर मनरिजवण रायड्सांची रंसचना सीलबंद करपाचें काम हातांत घेतलें. ह्या वेळार जात्रेंत पयलेच खेपे दोन जायंच व्हिलां आनी हेर रायड्सांची वेवस्था वेवसायिकांनी केल्ली. जात्रेंत उबारिल्ल्या वट्ट 18 संरचनांक सील मारलां.

मजगतीं, बुधवारा 31 डिसेंबराक अतिरिक्त जिल्होधिकारी पुंडलीक खोर्जुवेंकार हांणी आदेश जारी करून बोडगेश्वर जात्रेंत उबारिल्ल्या जायंट व्हील आनी मनरिजवण रायड्सांक चलोवपा खातीर गरजेचे नाहरकत दाखले आनी सुरक्षा परवाने सादर करूंक नाशिल्ल्यान तांची संरचना तत्काळ सीलबंद करून तीं काडचीं, अशे निर्देश उपजिल्होधिकारी वर्षा परब आनी मामलेदार अनंत मळीक हांणी दिल्ले.

ते आदीं 26 डिसेंबराक अतिरिक्त जिल्होधिकाऱ्यान आदेश जारी करून अग्नीसुरक्षा संबंदीत परवानो नाशिल्ल्यान जायंट व्हील बंद दवरपाचे निर्देश संबंदीत धनयांक दिल्ले. तरी लेगीत प्रशासकीय यंत्रणांच्या घाळपणाक लागून आनीक एक अतिरिक्त जायंट व्हील आनी हेर मनरिजवण रायड्साच्यो संरचना उब्यो राविल्ल्यो. मजगतीं, श्रीदेव बोडगेश्वराचे जात्रेंत जायंट व्हील आनी हेर मनरिजवण रायड्साचो वेवसाय घालपाक हिंदूच धर्मांतल्या वेवसायिकाक दिवपाची मागणी कांय हिंदू संघटणांनी देवस्थान समितीक निवेदन सादर करून केल्ली. पूण देवस्थाना कडेन बिगर हिंदू वेवसायिकाचो अर्ज सादर जाल्ल्यान समितीन ताका वेवसाय करपाक परवानगी दिल्ली. उपरांत संबंदिताक म्हापशें पालिके सयत काय सरकारी यंत्रणांनी नाहरकत दाखलो दिल्लो. मात अग्नीसुरक्षा दाखलो मेळूंक नाशिल्लो. ताका लागून हिंदी संघटणांनी जिल्होधिकाऱ्या कडेन कागाळ केल्ली.