भांगरभूंय | प्रतिनिधी
मुख्यमंत्री, मंत्री, आमदारांनी घेतलें देवदर्शन
म्हापशें ः म्हापशेंचें नामनेचें आनी जागृत श्री देव बोडगेश्वर देवस्थानाची 88 वी जात्रा बिरेस्तारा हजारांनी भाविकांचे हाजेरींत उमेदीन सुरू जाली.
जत्रोत्सवाच्या पुजेच्या यजमानपदार देवस्थान समितीचे उपाध्यक्ष देवेश शिंदे हाजीर आशिल्ले. दनपरां 12 वरांचेर श्रींच्या पांयां कडेन नाल्ल दवरून आनी पुरयतान गार्हाणें घातल्या उपरांत ही जात्रा सुरू जाली.
ह्या वेळार म्हापशें वाठारांतलीं विवीध देवळां, विवीध संस्था, पुलीस, उजो पालोवपी दळ आनी पालिके वतीन देवाच्या पांयां कडेन फळांचो प्रसाद अर्पण केलो. विवीध मानेस्तां वांगडा मुख्यमंत्री डॉ. प्रमोद सावंत, उपसभापती जोशुआ डिसोझा, केंद्रीय मंत्री श्रीपाद नायक, मंत्री निळकंठ हळणकार, आमदार मायकल लोबो, आमदार डिलायला लोबो, नगराध्यक्ष शुभांगी वायंगणकार आनी आदले आतांच्या नगरसेवकांनी श्रींचें दर्शन घेतलें.
बुधवारा श्री देव बोडगेश्वराचे मुर्ती प्रतिश्ठापनेचो 33 वो वर्धापन दीस मनयलो. ह्या वेळार देवाक नवो भांगराचो दांडो अर्पण केलो. जाल्यार सांजवेळार सवायशिणीं वतीन दिपोत्सव मनयलो. रातचो दशावतारी नाट्यप्रयोग जालो.
बिरेस्तारा दनपरां मुखेल पुजा जाल्या उपरांत भाविकांनी देवदर्शन घेवपाक सुरू केलें. सांजवेळार पांडुरंग राऊळ आनी वांगडी कलाकारांची भजनाची कार्यावळ जाली. शुक्रार ता. 6 ते बुधवार 11 जानेवारी मेरेन सकाळीं 10 वरांचेर देवस्थानांत विवीध संस्था आनी संघटणां वतीन श्री सत्यनारायण महापुजा आनी महाप्रसाद जातलो. आयतार 15 जानेवारीक जात्रा सोंपतली.
जात्रे निमतान काल हजारांनी भाविकांनी श्रींचें देवदर्शन घेतलें. देवस्थाना भायर सकाळ सावन भाविकांनी रांको लायिल्ल्यो. ह्या वेळार राजकीय पक्षांचे फुडारी, लोकप्रतिनिधी, सरकारी अधिकारी आनी कार्यकर्त्यांनी देवस्थानांत येवन देवदर्शन घेतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
