बोडगिणी जात्रेंत पुलिसांचेर सुरी हल्लो

भांगरभूंय | प्रतिनिधी

तीग जखमी;  तकलेन सुटिल्ल्या दुबाविताक अटक

भांगरभूंय । प्रतिनिधी

म्हापशें: म्हापशें बोडगिणीच्या श्रीदेव बोडगेश्वराचे जात्रेंत देवळाच्या वाठारांत एका तकलेन सुटिल्ल्या मनशाक तिगा पुलिसांचेर सुरी हल्लो केलो. तातूंत गंभीर जखमी जाल्ल्या दोग पुलिसांचेर गोमॅकाँत जाल्यार एकल्याटेर म्हापशेंच्या जिल्हो हॉस्पिटलांत उपचार चालू आसात.

जखमीं मदीं शरद हळजी (कळंगूट पुलीस स्टेशन), रितेश महाले (हणजूणें पुलीस स्टेशन) आनी विठ्ठल नारोजी (पणजी पुलीस स्टेशन) ह्या पुलीस कॉम्स्टेबलांचो आस्पाव आसा. जखमी शरद आनी विठ्ठल ह्या दोगांक गोमॅकाँत जाल्यार रितेशाक जिल्हो हॉस्पिटलांत उपचारा खातीर दाखल केल्यात. म्हापशें पुलिसांनी हल्लेखोर दुबावीत आयुश मनोज नायक (रा. कळंगूट) हाका अटक केल्या.

ही घडणूक बुधवारा 15 जानेवारीक सांजेच्या 5.30 वरांच्या सुमाराक घडली. आयतार सावन सुरू जाल्ले श्रीदेव बोडगेस्वराचे जात्रेचो बुधवारा चवथो दीस आशिल्लो. सांजे वेळार देवळाच्या प्राकारांत उबारिल्ले माचयेर भरतनाट्यमाची कार्यावळ चालू आशिल्ली. निवेदिका निवेदन करताली. त्या वेळार तकलेन सुटिल्लो दुबावीत थंय आयलो. ताणें निवेदिका तशेंच देवस्थान समितीच्या पदाधिकाऱ्यांक उद्देशून बुरश्यां उतरांनी गाळी संवपाक सुरवात केली. तशेंच व्हडा व्हडान बोवाळ मारपाक लागलो.

दुबावीत मनीस कार्यावळीचे सुवातेर बोवाळ मारता हे खातीर देवळाच्या आवारांतले पुलीस चौकींतल्या पुलिसांक देवस्थान समितीन आपयले. तीग पुलीस आयले आनी ताका शांत रावपाक सांगलें तशेंच ताका थंयच्यान कुशीक व्हरपाचो यत्न करपाक लागले. त्या वेळार दुबावितान अचकीत आपले कडली धारेची सुरू काडून पुलिसांचेर हल्लो केलो. तातूंत पुलिसांक हाताचेर, पोटाचेर तशेंच फाटीचेर गंभीर दुखापत जाली.

हो प्रकार पळोवन पुलीस चौकी वयले हेर पुलिसांनी घडणुकेचे सुवातेर धांव घेतली आनी दुबाविताचे तावडेंतल्यान जखमी पुलिसांची सुटका केली. तशेंच दुबाविताक धरलो. दुबाविताक आडावन धरपाक लोकांनी पुलिसांची मजत केली. ह्या वेळार लोकांनी दुबाविताक बरोच बडयलो. पुलिसांनी दुबाविताचे हातपांय बांदून पुलीस स्टेशनाचेर व्हेलो. तशेंच जखमी पुलिसांक जिल्हो हॉस्पिटलांत दाखल केले. ह्या प्रकरणांत म्हापशें पुलीस निरिक्षक निखील पालेकार हांच्या मार्गदर्शना खाला पुलीस तपास करतात.