भांगरभूंय | प्रतिनिधी
ऑपरेटर धारेप्पा झिराली, इब्राहीम शरीफ साब हांकांय सशर्त जामीन
कळंगूट बोट बुडून मरण प्रकरण
पणजी: कळंगूट दर्यांत जलसफरी मजगतीं बोट बुडून पर्यटकाच्या मरण प्रकरणांत बोटीची धनीन मिना कुतिन्होक पणजेंतल्या उत्तर गोंय जिल्हो आनी सत्र न्यायालयान 50 हजार आनी हेर अटींचेर सशर्त जामीन मंजूर केलो. तशेंच अटक केल्ले बोट ऑपरेटर धारेप्पा झिराली आनी इब्राहीम शरीफ साब ह्या दोगांक दरेकी 25 हजार रुपया आनी हेर अटीचेर सशर्त जामीन मंजूर केलो.
खेड महाराष्ट्रांतले पोफळकर, चिंचविलकर आनी हंबीर ह्या कुटुंबांतले 13 जाण गोंयांत नातलांचे सुटये निमतान आयिल्ले. बुधवार 25 वेर तांणी कळंगूट दर्यादेगेर बोटींतल्यान जलसफरीचो आनंद घेवपा खातीर जॉन वॉटर स्पोर्ट्साची बोट घेतिल्ली. त्या वेळार बोट ऑपरेटर धारेप्पा झिराली आनी इब्राहीम शरीफ साब ह्या दोगांनी वयल्या 13 जाणां सयत आनीक पर्यटकांक बोटींत घेतले. तशेंच बोटीची तांक उणी आसून लेगीत ऑपरेटरान बोटींत 18 ते 20 पर्यटकांक बोटींत घेतले.
त्या वेळार बोट दर्यांत शंबर मिटर अंतराचेर गेले उपरांत बोटीचें इंजीन रेंवेंत रुतून बंद पडलें. त्याच वेळार दर्याच्या ल्हाराचो नेटाचो धपको बशिल्ल्यान बोट उदकांत लंवडली. हे दुर्घटनेंतल्यान सूर्यकांत पोफळकर हांकां मरण आयलें. जाल्यार तांच्या चल्या सयत पांच जाणांक बांबोळे गोंय वैजकी म्हाविद्यालय हॉस्पिटलांत दाखल केल्ले. तांचेर उपचार करून त्या पांचूय जाणांक घरा धाडून दिल्ले.
ह्या प्रकरणांत पणजी दर्यादेग पुलिसांनी बोटीची धनीन मिना कुतिन्हो हिचे सयत धारेप्पा झिराली आनी इब्राहीम शरीफ साब ह्या दोगां ऑपरेटरांचेर गुन्यांव दाखल केलो. उपरांत पुलिसांनी दोनूय बोट ऑपरेटरांक अटक केली. अटक केल्ल्या बोट ऑपरेटरांक पणजेंतल्या पयलो वर्ग न्यायालयान पयलीं चार दिसांची पुलीस कोठी दिली. ती सोंपले उपरांत त्या दोगांकूय न्यायालयीन कोठी दिली.
मजगतीं, त्या दोगांनी पणजेंतल्या उत्तर गोंय जिल्हो आनी सत्र न्यायालयांत जामीन अर्ज दाखल केला. तशेंच बोट धनीन मिना कुतिन्होन न्यायालयांत अटकपूर्व जामीन अर्ज दाखल केलो. ह्या प्रकरणांत न्यायालयान बोट धनीन मिना कुतिन्हो हिका 50 हजार आनी हेर अटीचेर सशर्त अटकपूर्व जामीन मंजूर केलो. जाल्यार अटक केल्ल्या दोगां ऑपरेटरांक दरेकी 25 हजार रुपया आनी हेर अटीचेर सशर्त जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
