भांगरभूंय | प्रतिनिधी
लायट, उजो आनी उदका कडेन शाणपणां वा मस्ती करपाक जायना, अशें म्हणटात. गाडी चलयतनाय हें घट मतींत दवरूंक जाय, मात अदींमदीं आमकां हाचो विसर पडटा आनी मागीर नाका तें घडटा. पयर कळंगूटे पर्यटकांक घेवन सफरीक वचपी बोट बुडली आनी एकल्याक मरण आयलें. फाटींय बोटीचे अपघात जायत हे भिरांतेन बोवाळ जाल्लो. उदका खेळां (हातूंत बोट रायडिंगूय आयलें.) मळाचेर फक्त पांचूच गोंयकार आसात, उरिल्ले सगले युपी, बिहार, कर्नाटकाचे असो आरोप जाल्लो. हे खेपे अपघात जाला, ती बोट गोंयकाराची! तिचो परवानो आतां निलंबीत केला. नेमाक धरून ती बोट चलयनाशिल्ले, अशें सरकारी यंत्रणेचें म्हणणें. आतां चवकशी जावन मुखार कितें जाता तें पळोवचें पडटलें. तरीय सरकारान ह्या खेळांचेर नियंत्रण हाडचें पडटलें. कारण पर्यटन हें आमचें पोट. अश्यो दुर्घटना जावपाक लागल्यो जाल्यार ताचेर परिणाम जावं येता.
बनाना रायड नांवाचो एक प्रकार गोंयांत चलता. एक स्पीड बोट केळ्या सारक्या दिसपी हळडुव्या बोटीक ओडीत व्हरता. बनाना बोटीचेर दोनूय वटेन पांय सोडून बसपाचें. मागीर स्पीड बोट उडक्यो मारीत वाकडी तिकडी वता आनी फाटल्यान पर्यटक किंळच्यो मारीत सफरीचो आनंद (?) घेतात. अर्थांत सगले लायफ जॅकेट घालतात. पयर अपघात जाला ताचो व्हिडियो मुखार आयला. तातूंत एका भुरग्यान लायफ जॅकेट घालूंक ना, हें स्पश्ट दिसता. धाकटुले बोटींत तेरा पर्यटक आनी हेरूय कांय जाण दिसतात. दुसरे भोंवडे वेळार बोटीचें इंजीन रेंवेंत रोमलें आनी बंद पडलें. तेन्नाच आयिल्ल्या नेटाच्या ल्हाराक लागून बोट उदकांत उमथली. बोटीक तकली आपटल्ल्यान 45 वर्सां पिरायेच्या खेड- रत्नागिरीच्या एका पर्यटकाक मरण आयलें. हीं तीन कुटुंबां गोंय पळोवपाक आयिल्लीं. दुर्घटना, अपघात नकळटां जातात. तरीय सगल्यांनी सादूर रावपाक जाय. बोटीच्या कर्मचाऱ्यांनी सुरक्षेचे उपाय घेवंक जाय. अचकीत दुर्घटना, अपघात जालो जाल्यार कितें पावलां उखलपाचीं, पर्यटकांक कशे वाटावपाचे, ताची खबरदारी पयलींच घेवपाक जाय. दर्या उंचाबळ जाल्लो आसतना बोट रायड करपाक जायना. 2- 3 बोटी सुरक्षीत अंतर दवरून एकाच वेळार भायर सरल्यार दुर्घटने वेळार एकमेकांक मजत करूं येता. (मुंबय प्रवासी बोटीचेर दुसरी बोट आपटून हालींच अपघात जालो. तातूंत 13 जाणांक मरण आयिल्लें.) कळंगूटे दर्यादेग आनी पर्यटक पुलीस बोटीं सयत धांवले. एम्बुलन्स पावली. कर्मचाऱ्यांनी उपचार केले…. म्हूण बुचकळिल्ले हेर पर्यटक वाटावले. तरीय पांच जाणांची भलायकी हुस्क्याची आसा खंय. पेंवपाक येना, अश्या लोकांक घेवन जेन्ना बोट रायड जाता, तेन्ना आयोजकांनी सज्ज रावपाक नाका? पर्यटकांचेरूय जापसालदारकी आसता. बोट दर्यांत आसतना मदींच पदां म्हणीत नाचपाक लागले जाल्यार कितें जातलें हें वेगळें सांगपाक नाका. कालचे बोटींत तशें जावंक ना, तरीय अपघात जालो. बोटीचो परवानो निलंबीत केला. दोशींक ख्यास्त जावचीच, पूण ताचे परस म्हत्वाची गजाल म्हणल्यार सुरक्षेचे सगले नेम पाळटात काय नात हें पळोवपाची. नासल्यार तांचेर तशी सक्ती करपाची. कळंगूटचे दुर्घटनेंत 4, 5 वर्साचीं भुरगीं आशिल्लीं. दर्यांत ल्हारां येतात, पळोवपाक तें भिरांकूळ दिसता. बोट रायड सारके खेळ करपाचेच आसत जाल्यार न्हंयांचो वापर करप शक्य ना? थंय फेरीबोटींक मात आडखळ जावची ना, हें पळोवचें पडटलें.
दर्यादेगांचेर कोण कसले उदका खेळ करतात, तांचे कडेन परवाने, सुरक्षा वेवस्था आसा काय ना, प्रशिक्षक कशे आसात, हजारांनी रुपया घेवन आयोजक पर्यटकांक योग्य त्यो सुविधा दितात काय नात…. हें कोणे पळोवपाचें? उदका खेळां मळार वावुरप्यांक पर्यटकां कडेन धड उलोवपाक कळना, नांव बरोवपाक कळना, तांकां पर्यटन खात्याची वा हेर खंयच्याच सरकारी खात्यांची परवानगी ना, अशें गोंयकार वेवसायिकांनी फाटीं म्हणिल्लें. ताची उपरांत चवकशी जाली? आनी वेवसायीक म्हणटात तें खरें जाल्यार हें कोणाक लागून घडटा? पर्यटकां कडल्यान तिकेट घेवपी आयोजक पर्यटन खात्याक पयशे भरतात व्हय? थारावीक मनशांक हप्ते बी दिवन कोण दर्यादेगांचेर उदका खेळांचो बेकायदेशीर वेवसाय करिनात मूं? कांय म्हयन्यां पयलीं ह्याच विशयाचेर बरयतना, हे खेळ पर्यटन खात्यान स्वताच कित्याक हातांत घेवचे न्हय?, अशें म्हणिल्लें. सरकारान खास प्रशिक्षीत गोंयकार तरणाट्यांक नेमचे. बोट रायड, बलून रायड, स्पीड बोट सगलें करचें, पूण सुरक्षेचे उपाय घेवन. दुर्घटना जाली तरी पर्यटकाचो जीव वाटावतलो, इतली तरी सुरक्षा आसची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
