भांगरभूंय | प्रतिनिधी
पणजीः गोंयांत ऑनलायन फटवणूक जावपाच्यो घडणुको दिसान दीस वाडत आसात. फटोवपी लोक फटींगपणा करपाचे नवे मार्ग सोदून काडटात. आनी जायते जाण ह्या फटवणुकेंत बळी पडून आपले कश्टाचे पयशे व्हगडायतात. अशेंच एक बोगस ‘आरटीओ ई-चलना’ ची फायल धाडून 1.37 लाख रुपया व्हगडायिल्ल्याचे प्रकरण उजवाडाक आयला. ह्या प्रकरणांत पणजी पुलिसांनी अनवळखी आड गुन्यांव नोंद केलो.
करंझाळेच्या एकल्यान पणजी पुलिशेंत दाखल केल्ले कागाळी प्रमाण, एका अनवळखीन ताका बनावट ‘आरटीओ ई-चलन’ एपीके फायल धाडली. उपरांत ताणें ताका ती फायल डावनलोड लायली आनी सविस्तर म्हायती मागली.
बँक खात्याचो आनी वाहनाचो तपशील भरून धाडले उपरांत बँक खात्यांतल्यान 1 लाख 37 हजार 833 रुपया काडले. ह्या प्रकरणांत पणजी पुलिसांनी गुन्यांव नोंद केलो. पणजी पुलीस स्टेशनाचे उपनिरिक्षक महेश नायक वरिश्ठ अधिकाऱ्यांच्या मार्गदर्शना खाला फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
