भांगरभूंय | प्रतिनिधी
भांगरभूंय । प्रतिनिधी
पणजीः बोगदा- वास्को वीज खात्याचे मालमत्तेंत घुसखोरी करून जिवेशीं मारपाची धमकी दिल्ल्या प्रकरणांत बार धनया सयत चार जाणां आड कार्यकारी वीज अभियंते काशिनाथ शेट्ये हांणी पणजे पुलिशेंत कागाळ नोंद केल्या. हे चौगूय म्हाका मारतले हें आमदार संकल्प आमोणकाराचें विधान कागाळींत बरयला, पूण आमदारा आड कागाळ करुंक ना, अशी म्हायती काशिनाथ शेट्ये हांणी दिली.
शुक्रारा सकाळीं बोगदा वास्को वीज खात्याच्या मालमत्तेंत केबल काडतना काशिनाथ शेट्ये हांकां थळाव्यांनी हरकत घेतिल्ली. उपरांत थळावे आमदार संकल्प आमोणकार घडणुक थळार आयले उपरांत तांचे मदीं बाचाबाची जाली. उपरांत थळाव्यां आड कागाळ करपाची शिटकावणी शेट्ये हांणी दिली.
शेट्ये हांणी बोगदाचे थळावे ओमकार दुर्भाटकार, यश फडटे, योगेश पाटील आनी बार धनी सुधीर तारी हांचे आड झिरो एफआयआर नोंद केल्या. पणजी पुलिसांनी हे प्रकरण मुरगांव पुलिस स्टेशना कडेन धाडलां.
तशेंच हे चार दुबावित बोगदा बारांत सोरो पियेवंपाक बशिल्ले आनी उपरांत तांणी सरकारी अधिकाऱ्यांक आडखळ हाडून आमदार संकल्प आमोणकार हांकां फोन मारलो. उपरांत आमोणकार हांणी सांगलें, चवगूय जाण मारपेट करून म्हाका जिवेशीं मारून उडयतले, अशें शेट्ये हांणी कागाळीत नोंद केलां. जर हे चारुय दुबावितांचेर गुन्याव नोंद जावंक ना जाल्यार न्यायालयात वचपाची शिटकावणी तांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
