बोकड्यो राखता- राखता तो जालो पुलीस अधिकारी
भांगरभूंय | प्रतिनिधी
कोल्हापूर : परिक्षेचो निकाल आयलो तेन्ना तो बेळगांव लागसारच्या अथणी वाठारांत बोकड्यो घेवन भोंवतालो. युपीएससी परिक्षेंत तो देशांत ५५१ क्रमांक घेवन पास जालो आनी ताचे जिद्द, मेहनतीचें सार्थक जालें. धनगर समाजाच्या ह्या तरणाट्याचें नांव बिरदेव ढोणे (यमगे- कागल- कोल्हापूर). ल्हानपणा सावन तो बोकड्यो राखता. मात अभ्यासूय करतालो. बारावेंत विज्ञान फांट्यात तो पास जालो. आतां तो आयपीएस जाला. थोड्याच दिसांनी व्हडलो पुलीस अधिकारी म्हूण तो कामाक रुजू जातलो. परिस्थिती कशीय आसली तर जिद्दीन अभ्यास केल्यार येश हें मेळटाच, हें बिरदेवान दाखोवन दिलां.
बिरदेव फाटलीं चार वर्सां युपीएससीची तयारी करतालो. दोन फावटी यत्न करून ताका येश मेळूंक नासलें. मात आतां तो पास जाला. जिल्हो परिशदेचे शाळेंत तो शिकला. फाटलीं चार वर्सां तो नेमान जनरल नाॅलेजीचीं पुस्तकां आनी दिसाळीं वाचतालो. आतां दोन दिसांनी तो अथणीच्यान चलत बोकड्यो घेवन यमगे गांवांत येतलो. तेन्ना ताचो व्हडलो सत्कार करपाचें गांवकारांनी थारायलां. दिल्लींतल्या इश्टांनी फोन करून ताका पास जाल्ल्याचें सांगलें तेन्नाय तो बोकड्यो राखतालो. ताका एक व्हडली भयण आसा.
फोन चोरलो
युपीएससीची मुलाखत दितकच ज्ञानप्रबोधिनी अभ्यास केंद्रा वयल्यान घरा वतना रातच्या ११ वरांचेर राधीका भेळ हांगाच्यान म्हजो फोन चोरयेक गेल्लो. घरा सांगलें फोन बंद पडला. आयजूय हांव बीड शारांतल्या म्हज्या इश्टाचो फोन वापरतां. फोन चोरयेक वतकच हांव पुलिशेंत गेलों, तेन्ना तांणी म्हजी कागाळ पसून नोंद करून घेवंक ना, अशें बिरदेव हाणें सांगलें. आतां तो आयपीएस पुलीस अधिकारी जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
