भांगरभूंय | प्रतिनिधी
नाजाल्यार आमरण उपोशण, सांताक्रूज थळाव्यांची शिटकावणी
पणजीः सांताक्रूझांतल्या इतिहासीक बोंडवेल तळ्याच्या अस्तित्वाचो प्रस्न आतां चड गंभीर जाला. थळाव्यांनी गोंय राज्य पाणथळ प्राधिकरणाक आनी सरकारा कडेन मागणी केल्या. तळ्याच्या संरक्षणा खातीर केल्ल्या मागणींचेर सप्तकां भितर कारवाय जाली ना जाल्यार ‘आमरण उपोशण’ करपाची शिटकावणी थळाव्यांनी दिल्या. ह्या सप्तकाच्या काळांत घडिल्ल्या घडामोडींचो नियाळ घेतले उपरांत आंदोलनाची फुडली दिका थारायतले आनी वेळ आयल्ल्यार आंदोलन चड खर करतले अशेंय थळाव्यांनी स्पश्ट केलां. हे विशीं आझाद मैदानाचेर पत्रकार परिशद जाली.
तळ्याच्या प्रभाव क्षेत्रा संबंदी प्रशासकीय पांवड्यार खूब गोंदळ जाला आनी ताचो फायदो घेवन बेकायदेशीर बांदकाम चालू आसा असो आरोप थळाव्यांनी केलो. तळ्याचें संरक्षणाचे नेम विरोधी आसात, ओलाची जमीन अधिसुचोवणे प्रमाण 50 मीटर बफर झोन आसचो पडटा, जाल्यार उच्च न्यायालयाच्या आदेशा प्रमाण तळ्या भोंवतणी 100 मीटर बांदकाम नाशिल्लो झोन (No Construction Zone) आसप गरजेचें. पूण जमनीचेर प्रत्यक्षांत ह्या खंयच्याच झोनाच्यो शिमो थारावंक नात.
विशेश म्हळ्यार खंयच्याय प्रकारचो हायड्रोलॉजिकल सर्व्हे करिनासतना तळ्याच्या संवेदनशील वाठारांनी बांदकामां खातीर परवानग्यो दितात आनी हाका लागून तळ्याच्या सैमीक उदका संपत्तीक धोको निर्माण जाला. ह्या प्रकरणांत गोंय राज्य पाणथळ प्राधिकरणान बेगोबेग हस्तक्षेप करून तळ्याची मर्यादा थारावची आनी ताचें अस्तित्व तिगोवन दवरपा खातीर ठोस पावलां उबारचीं अशी मागणी सांताक्रूझच्या नागरिकांनी केल्या. तळ्याचें सुरक्षेचो प्रस्न रोखडोच सुटावो जालो ना जाल्यार गांवचे लोक खंयच्याय पांवड्यार झगडपाक तयार आसात अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
