बोंडला प्राणी अभयारण्य उक्तें

भांगरभूंय | प्रतिनिधी

उपरान संरक्षकाची म्हायती; दोनूय अहवाल नेगेटिव्ह

भांगरभूंय । प्रतिनिधी

पणजी : एवियन इन्फ्लूएंजाचे सेगीत दोन अहवाल नेगेटिव्ह आयले उपरांत बोंडला झू (प्राणीसंग्रहालय) 85 दिसां उपरांत लोकां खातीर उक्तो करपाचो आदेश जारी जाला. भोपाळचे प्रयोगशाळेंतल्यान सेगीत दोन अहवाल नेगेटिव्ह आयले. केंद्रीय प्राणीसंग्रहालय प्राधिकरणाच्या मार्गदर्शक तत्वांक अनुसरून प्राणीसंग्रहालय उक्तें करपाचो निर्णय घेतला, अशी म्हायती उपरान संरक्षक जीस वर्की हांणी दिली. 1 एप्रील सावन झू बंद आशिल्लो.

संसर्गजन्य दुयेंसाक (एविएन इन्फ्लुएंजा) लागून 3 काटांदर (सीवेट कॅट) आनी 2 रान मांजराक (वायल्ड कॅट) मरण आयिल्ल्यान बोंडला प्राणीसंग्रहालय लोकां खातीर बंद दवरिल्लें. दुयेंसाची लागण जावची न्हय म्हूण रान खात्यान ही खबरदारीची उपाययेवजण केल्ली. जनावरांचे दोतोर आनी रान खात्याचे अधिकारी दर दिसा परिस्थितीचो नियाळ घेताले. संसर्गजन्य दुयेंसाचो जंतू पयस जालो, हाची खातरजमा जावपाची गरज आशिल्ली. जनावरांच्या रगताचे नमुने घेवन ते भोपाळचे प्रयोगशाळेंत धाडटाले.

सगळ्यांत पयलीं मरण आयिल्ल्या जनावरांचे कुडींचे नमुने भोपाळचे प्रयोगशाळेंत धाडिल्ले. एविएन इन्फ्लूएंजा दुयेंसाक लागून काटांदर आनी रान मांजरांक मरण आयिल्ल्याचें सिद्ध जालें. प्राणीसंग्रहालय परिघांत हो विशाणू (जंतू) नाशिल्ल्याची खातरजमा जावपाची गरज आशिल्ली. हो विशाणू आसलो जाल्यार भेट दिवपी लोकां खातीर लेगीत तो घातक थारपाक शकता. रान खात्याची कसलेच तरेची जोखीम घेवपाची तयारी नासता. नॅशनल इन्स्टिट्यूट ऑफ हाय सॅक्युरिटी अॅनिमल डिसीज, भोपाळ हांचे कडल्यान रगताचे सेगीत दोन अहवाल नेगेटिव्ह आयले उपरांतूच प्राणीसंग्रहालय लोकां खातीर उक्तो करचो, अशी मार्गदर्शक तत्वां आसा. हाका लागून इतलो तेंप प्राणीसंग्रहायलय बंद दवरपाचो निर्णय घेतलो.

हाचे पयलीं लेगीत बोंडला अभयारण्यांतल्या प्राणीसंग्रहालया मदल्या जनावरांक मरण आयलां. पिराय जाले उपरांत कांय जनावरांक मरण येता. नेमीतपणान जनावरांची तपासणी जाता, तरी सगळ्या दुयेंसांचेर उपाय जाय नात. प्राणीसंग्रहालय बंद दवरपा विशीं सरकाराक उसरां म्हायती दिवपा खातीर रान खात्याच्या अधिकाऱ्यांक रान मंत्री विश्वजीत राणे हांणी ताकीद दिल्ली. बसका घेवन मंत्र्यांनी तेन्ना बोंडला प्राणीसंग्रहलायचे स्थितीचो नियाळ घेतिल्लो.