भांगरभूंय | प्रतिनिधी
पणजी : बोंडला अभयारण्याचें वेवस्थापन, पर्यटन उदरगत तशेंच संशोधनाक उर्बा दिवपा खातीर सरकारान समिती स्थापन केल्या. साबार समिती आनी वेवस्थापन समिती अश्या दोन समित्यांची अधिसुचोवणी जारी जाल्या. दोनूय समित्यांच्यो जापसालदारक्यो वेगळ्यो आसात.
बोंडला अभयारण्याची देखभाल, वेवस्थापन, सुदारणा करपा सयत नवे उपक्रम चालीक लावपाचो हेतू आसा.
साबार समितींचे रानां खात्याचे मंत्री विश्वजीत राणे हे अध्यक्ष आसा. रानां खात्याचे सचीव, मुखेल रानां संरक्षक, अर्थ सचीव, गोरवां पोसपी खात्याचे सचीव, डॉ. केदार पडते, महेश पाटील हे समितीचे वांगडी आसात. वायल्ड लायफ वॉर्डन हे समितीचे वांगडी सचीव आसतले. नव्यो येवजण्यो तशेंच आराखडे साबार समितीक तयार करचे पडटले.
हे भायर मुखेल रानां जीव संरक्षकाच्या फुडारपणा खाला वेवस्थापन समिती स्थापन जाल्या. मुखेल रानां संरक्षक, गोंय विद्यापीठ जीवशास्त्र फांट्याचो मुखेली, गोरवां पोसपी खात्याचो संचालक, बोंडलाचो वैजकी अधिकारी, लेखा फांट्याचो अधिकारी हे वांगडी आसतले. बोंडला प्राणी संग्रहालयाचो संचालक हो समितीचो वांगडी सचीव आसतलो. वेवस्थापन समितीचो कार्यकाळ 5 वर्सांचो आसतलो. वर्साक दोन बसका घेवप बंधनकारक आसा.
तरेकवार कार्यावळी, खर्च हाचो आराखडो तयार करपा सयत वेवस्थापन समितीक देखभाल पळोवची पडटली. बोंडला अभयारण्यात पर्यटन वाडपा सयत संशोधन जावपाची गरज आसा. पर्यटन वाडोवपा खातीर मार्केटिंगां सयत नवे उपक्रम हातांत घेवपाची गरज आसा. हे हेतान समितीची स्थापना जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
