भांगरभूंय | प्रतिनिधी
अपमानास्पद गजालीन लोकांनी निरशेवपाचो यत्न केल्लो. अशें आसून लेगीत लिलीपूट केन्नाच नाउमेदी जालो ना.
उंचायेन ठेंगणो, पूण सिनेमांत अभिनय करपाचें उंचेलें सपन पुराय करपाचो निश्चेव केल्लो लिलीपूट हाचो जल्म 3 ऑक्टोबर 1949 दिसा बिहारांतल्या गया शारांत जालो. मूळ नांव एम एम फारुकी. पूण सिनेमा खातीर ताणेंच ‘लिलीपुट’ हें गलिव्हर ट्रॅव्हल्स ह्या जगप्रसिद्ध पुस्तकांतल्या बुटक्यांचें नांव वेंचलें.
अभिनेते लिलीपुटाक भुरगेपणांतल्यान मोटवेपणा खातीर अपमान, टिंगल, टवाळकी, दुर्लक्षित करप, नांवां दवरपा सारकेलें जायते अपमानास्पद गजालीन लोकांनी निरशेवपाचो यत्न केल्लो. अशें आसून लेगीत लिलीपूट केन्नाच नाउमेदी जालो ना. तागेलो अभिनया वटेन कल आशिल्लो. स्वताच लेखन करुन ती संहिता तो रंगमाचयेर सादर करताले. ताणें इनामांय मेळयल्यांत. 1975 वर्सा इश्टा कडल्यान 130 रुपया घेवन अभिनेतो जावपाचें सपन पुराय करपाक तो मुंबय आयलो तेन्ना ताचो खरो संघर्श सुरु जालो. ताका काम मेळूंक ना. 15 दीस उपाशी पोटार पोस्टर दसोवप, फोंड खणप, लांकडां कापप तें होर्डिंग लावप असलीं दिसवड्याचीं कामां ताणें केलीं. उपरांत पृथ्वी थिएटरांतलीं तागेलीं चडशी नाटकां गाजलीं. नाट्य मळा वयल्या रथी- म्हारथींनी लिलीपूटालो अभिनय वाखाणलो. तागेल्या दंगा, एक गधा ह्या नाटकांनी रंगमाचयेर ते तेंपार धुमाकूळ घाल्लो. ताचो अभिनय पळोवन दिग्दर्शक सुभाष घईन ताका अमिताभ बच्चन वांगडा मुखेल खलनायकाची भूमिका दिली आनी आपले कचेरींत तागेली रावपाचीं वेवस्था केली. पूण दुर्दैवान तो सिनेमा तयार जालोच ना. फुडें निर्मातो निर्देशक रामानंद सागरान लिलीपुटाक पयलो ब्रेक दिलो.
1985 त कारकिर्द सुरू करतना लिलीपुटान सिनेमा आनी टीव्ही दोनूय मळार पावल दवरलें. पयलीं ‘सागर’ सिनेमांत आनी तेच वर्सा ‘इधर उधर’ हे टिव्ही माळयेंत तो दिसलो. ‘देख भाई देख’ माळेंत लिलीपुटान अभिनय केल्लो. ह्या माळांतल्याच अभिनया खातीर लिलीपुटाक जबरदस्त लोकप्रीयता मेळ्ळी. ह्या माळांचें संवाद लेखन लेगीत ताणेंच केल्लें. उपरांत ताणें ‘विक्रम और बेताल’ हे दूरदर्शन माळेंत अभिनय केलो. हेच माळेन ताका चड प्रसिद्धी दिली. ताणें देख भाई देख, नटखट, जबान संभाल के, शरारत, अदालत, लक लक की बात हातूंन अभिनय केला. हुकूमत, आंटी नंबर 1, शरारत, बंटी और बबली, ग्रेम का गेम आनी कामयाब ह्या सिनेमांनी तो दिसलो.
अभिनय करपा वांगडा लिलीपूटान कांय टिव्ही माळांच्यो कथाय बरयल्यात. नसिरूद्दीन शाह, शाहरुख खान हांच्या ‘चमत्कार’ आनी ‘देख भाई देख’, ‘इधर उधर’ चें कथा लेखन केलां. लिलिपुट हाका बुटक्याचें कथेचेर सिनेमा काडचो आसा आनी तातूंत भूमिका करपाचो, तेच कथेचेर कादंबरी बरोवपाचो ताचो विचार आसा. तागेली घरकान्न लेखा हिणें लिलिपुटाक संवसारांत वांगड दिल्ले खातीर तो कृतज्ञ आसा. तांगेल्यो दोन धुवो. बापायले फिल्मी कुशळटायेचो तांका तसो उपेग जालो ना. सद्या चालू आशिल्ले ‘मिर्झापूर’ ह्या वेब सीरिजांतलें दादा त्यागी हे तागेलें पात्र बरेंच गाजता. लिलीपुट मोटवो, पूण ह्या सैमिक व्यंगाक ताणें येसस्वीपणाचे वाटे आड येवंक दिवंक ना. लिलीपुटाची ह्या उद्देगांतलें लोक खूब फकाणां करताले. ताणें प्रतिभेच्या बळग्यार फिल्मी मळबाक गवसणी घालून वेगळी उंचाय गाठली, हातूंत दुबाव ना.
—————————
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
