भांगरभूंय | प्रतिनिधी
रुबाबदार, देखणें व्यक्तीमत्व, घणाघात डायलॉग, गुंडांक एकल्यानूच येथिश्ट बडोवपी नायक, भावनाप्रधान प्रियकर, शेतकार अशा भोवढंगी प्रतिमेन सुमार 60 वर्सां हिंदी सिने मळार आपल्या अभिनयाचें साम्राज्य निर्माण करपी, सिने रसिकांच्या मनार अधिराज्य गाजोवपी, सुमारा भायर लोकप्रियता आशिल्लो अभिनेतो धर्मेंद्र काळाच्या पड्ड्या आड गेलो, आनी तांचे कोट्यांनी रसीक दुख्खांत बुडले. फाटलो म्हयनोभर ते मरणा कडेन झूज दिताले. पिरायेच्या 89व्या वर्सा सुरू जाल्लें हें झूज निमाणें जाण्टेपणांत तांचे भलायकेन सांगात दिवंक नाशिल्ल्यान सोंपलें. ते उपचारा खातीर हॉस्पिटलांत आसतनाच तांच्या मरणाची वावडी पातळिल्ली. निमाणें तांणी पिरायेच्या 89 व्या वर्सा संवसाराचो निरोप घेतलो.
अखंड भारतांतल्या ब्रिटीशकालीन पंजाब राज्यांतल्या लुधियाना जिल्ह्यांत जल्मल्ले धर्मेंद्र हांचे मूळ नांव कृष्ण देओल. शिक्षणा उपरांत आपल्या शेतांत काम करपी कृष्ण हांकां नियतीन हिंदी सिने मळार हाडलें. 1960 वर्सा हिंदी सिने मळार पावल दवरिल्ल्या कृष्णचें नांव धर्मेंद्र अशें जालें आनी त्याच नांवान आपल्या सुरेख, सकस अभिनयाच्या बळार ते लोकप्रियतेचे तेंगशेर पावले. तांणी 260 परस चड सिनेमांनी नायक, सहनायक आनी चरित्र नायकाची भुमिकाय तांणी जीव ओतून साकारल्यात. खंयचीय भुमिका ल्हान, व्हड समजिनासतना ते भुमिकेक तांणी आपल्या अभिनयाच्या बळार न्याय दिला.
मारपेटीच्या सिनेमांनी जाल्यार ते नायकूच आशिल्ले. शोले, चुपके चुपके, दादागिरी, दिल्लगी, जीवन-मृत्यू, सत्यकाम, अनुपमा, किनारा, स्वामी ह्या तांच्या सिनेमांतल्यो भुमिका सुमारा भायर गाजल्यो. फाटलीं 50 वर्सां चार पिळग्यांच्या सिने रसिकांचेर लोकप्रियतेचो मोनेळ घालपी शोले सिनेमाच्या शुटिंगे वेळार तांचे हेमामाली कडेन प्रेम जुळ्ळें आनी लग्न जाल्ले आसतनाय तांणी हेमामालिनी कडेन लग्न केलें. आनी हें लग्न गाजलें लेगीत. सिनेमळा वेलो अभिनय हो तांचो स्वास आनी ध्यास आशिल्लो. ह्या मायानगरीत दीर्घ काळ रावन सुमारा भायर पयसो, कीर्त, संपत्ती मेळयले उपरांतूय तांचे सादेंपण निमाणें मेरेन कायम उरलें. हिंदी सिनेमांत सामान्य मनशांचें प्रतिनिधित्व करपी नायकाच्यो भुमिका तांणी विलक्षण ताकदीन साकारिल्ल्यान सिने रसिकांचो लाडको नायक थारलो.
आपल्या भुरग्यांक सिनेमांत हाडपा खातीर तांणी स्वताची चित्रपट निर्मितीची संस्था सुरू केली आनी चल्यांक हिंदी सिनेमळार हाडले. सनी देओल आनी बॉबी देओल हे तांचे दोन पूत आपल्या अभिनयाच्या बळार लोकप्रीय जाले. ‘बसंती इन कुत्तो के सामने मत नाचना’ हो शोले सिनेमांतलो डायलॉग सुमारा भायर गाजलो. जाल्यार हेर सिनेमांतलेय तांचे डायलॉग अजरामर जाले. जिणेच्या उत्तरार्धात मायानगरीतलो झगमगाट, प्रसिद्धी, लौकीक हें सगलें सोडून धर्मेंद्र लोणावळ्या कुशीच्या आपल्या शेतांत तांची पयली बायल प्रकाश कौर हांचे सयत थंडसाणेन शेतकाराची जीण जगताले. कांय काळ ते खासदारूय आशिल्ले. पूण राजकारणांत ते रमले नात. राजकारण सोडून ते परतून शेतकार जाले. काळे मातयेंत काम करप, गायो, म्हशीं हांच्या सहवासांत रावप आनी सेंद्रीय शेतांत प्रयोग करप हीच तांची जिणेच्या उत्तरार्धातली जीण आशिल्ली. हाडाचो शेतकार आनी हिंदी सिनेमळा वेलो अभिनायक आशिल्लो धर्मेंद्र संवसाराचो निरोप घेवन गेल्लो आसलो तरी चित्रपटाच्या अभिनयान ते ल्हानूच आसात.
लोकप्रीय आसून लेगीत
राजकी प्रवास अपेशी
हिंदी सिनेमळा वेलो ‘ही-मॅन’ धर्मेंद्र हांणी 2004 वर्सा भाजपाचे तिकेटीचेर बिकानेर सावन लोकसभेची वेंचणूक जिखिल्ली. ह्या जेश्ठ अभिनेत्याचेर 2004 वर्सा भाजपाच्या स्वींग इंडिया मोहिमेचो खूब प्रभाव पडलो. उपरांत तांणी राजकारणांत प्रवेश केलो. शत्रुघ्न सिन्हा हांचे सयत तांणी भाजपाचे ज्येश्ठ फुडारी लालकृष्ण अडवाणी हांची भेट घेतली. हे भेटींतल्यान तांच्या राजकी प्रवासाची सुरवात जाली. भाजपान धर्मेंद्र हांकां राजस्थानांतल्या बिकानेर मतदारसंघांतल्यान उमेदवारी दिली. तांच्या लोकप्रियतेच्या बळार धर्मेंद्र हांणी काँग्रेसीचे रामेश्वर लाल दुडी हांचेर सुमार 60 हजार मतांनी हार घालून तांणी संसदेंत पावल दवरलें. उपरांत पांच वर्सांनी तांची राजकी कारकीर्द निरशेवणेंत बदल्ली. तांणी परतून केन्नाच वेंचणूक लडोवचो ना असो सोपूत घेतलो.
शिवाजी चौगुले
9867732504
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
