बॉलरांनी आनी पंतान मॅचींत हाडली उमळशीक

भांगरभूंय | प्रतिनिधी

भारताच्या बॉलरां उपरांत ऋषभ पंताचे बॅटिंगेन बॉर्डर-गावस्कर ट्रॉफीची सिडनी टॅस्ट उमळशीक वाडोवपी स्थितींत हाडल्या. पंत अर्द शेंकडो बाद जालो खरो. पूण, जे तरेन खेळपट्टी वागपाक लागल्या तें पळयलें जाल्यार आयज तिसऱ्या दिसा कितेंय घडपाक शकता. भारतान दुसऱ्या दिसाचो खेळ सोंप मेरेन आपल्या दुसऱ्या डावांत 6 विकेटी व्हगडावन 141 धांवड्यो केल्यात. ताची आघाडी 145 धांवड्यां मेरेन पावल्या.

दुसऱ्या डावांत लेगीत भारताची सुरवात बरी जावंक ना. स्कॉट बोलॅण्डान दुसऱ्या डावांत लेगीत आपलो शेक दवरलो. ताणें लोकेश राहुलाक बोल्ड करून पयली विकेट मेळयली. कांय वेळा उपरांत दुसरो ओपनर यशस्वी जयस्वाल लेगीत तंबूंत धाडलो. ते उपरांत विराट कोहलीक बाद करून भारताचें संकश्ट वाडयलें. बो वॅबस्टरान शुभमन गिलाक बाद करून आपली पयली टॅस्ट विकेट मेळयली.

भारतान 78 धांवड्यांचेर 4 विकेटी व्हगडायिल्ल्यो. अशा वेळार ऋषभ पंतान आक्रमक बॅटींग करून बॉलरांक बॅकफुटाचेर धुकलपाचो यत्न केलो. ताणें मैदानाचे सरभोवतणी बॉल मारलो. मिचेल स्टार्काक सेगीत दोन सके मारून आपलो अर्द शेंकडो पुर्ण केलो. पूण, भायर वचपी कमिन्साच्या बॉलाचेर सको मारपाच्या यत्नांत तो बाद जालो. कांय वेळान नितीश कुमार रेड्डी लेगीत रोखडोच बाद जालो.

ते पयलीं भारताच्या बॉलरांनी जबरदस्त बॉलींग घाली. दिसाची पयली विकेट मार्नस लाबशेनाची पडली. ताका जसप्रीत बुमरान बाद केलो. पुर्ण माळेंत फॉर्माच्या सोदांत आशिल्ल्या मोहम्मद सिराजान दोन विकेटी घेतल्यो. माळेंत आपली पयली मॅच खेळपी प्रसिद्ध कृष्णान लेगीत रोखडोच फॉर्म मेळयलो. ताणें स्टिवन स्मिथाक बाद केलो. एक वेळ असो लेगीत आयलो की दुखापतीक लागून मुखेली बुमरा स्कॅन करपाक मैदान सोडून गेलो. ताच्या अहवालाची सगले वाट पळयताले, जाल्यार दुसरे वटेन पदार्पणाची मॅच खेळपी बो वेबस्टरान खेळपट्टीचेर जम बसयिल्लो. ताका मुखेली पॅट कमिन्स योग्य रितीन साथ दितालो. पूण, सिराज, प्रसिद्ध आनी नितीश कुमार रेड्डी हांणी बुमराची गैरहाजेरी जाणावपाक दिली ना.

नितीशान आपल्या दोन ओव्हरींनी कमिन्स आनी मिचेल स्टार्काक बाद केलो. ते उपरांत अर्द शेंकड्याची खेळी करपी वेबस्टराक प्रसिद्ध कृष्णान बाद केलो. निमाणी विकेट सिराजान घेतली. अशे तरेन ऑस्ट्रेलियेचो पयलो डाव फकत 181 धांवड्यांचेर सोंपलो.