भांगरभूंय | प्रतिनिधी
मुंबय, खबरां संस्था: ब्रेकअप जावपाच्या भंयान एके विचित्र घडणुकेंत मुंबयचे एके तरणाटेक सायबर फटवणुकेंत साडेतीन लाख रुपया वगडावचे पडले. तिचो इश्ट तिचे कडेन बरो वागनाशिल्ल्यान ती तरणाटी अस्वस्थ जाल्ली. तिचो मोगी दुसरे चलयेच्या मोगांत आसूं येता असो तिका दुबाव आयलो. सतत नाका आशिल्ले विचार येताले म्हणून तिणें सोशल मिडियाचेर जायराती वरवीं मदत घेवपाचें थारायलें. इन्स्टाग्रामार ते चलयेक ‘ऑनलायन भविश्य जाणून घेयात‘ अशी जायरात दिसली. थंय आपली वैयक्तीक म्हायती दिवन नोंदणी केले उपरांत तिणें कथित ज्योतिश्या कडेन आपल्या इश्टा विशीं विचारलें. पूण तिचेर आनी तिच्या इश्टाचेर कोणें काळो जादू केल्ल्याचें सांगून तिचे कडल्यान पुजे खातीर साडेतीन लाख रुपया घेतले. हाचे उपरांत ते तरणाटेक आपूण फटवल्ल्याचें लक्षांत आयलें.
नेमकें कितें घडलें?
मुंबयच्या सांताक्रूझ वाठारांत रावपी तन्वीची (नांव बदल्लां) वळख फाटल्या वर्सा एका तरणाट्या कडेन जाली. वळखी उपरांत दोगांय मदीं इश्टागत जाली आनी इश्टागती उपरांत मोग. सुरवातेक तो तरणाटो तन्वी वांगडा बरो वागतालो, मात कांय दिसांनी तो तिका टाळपाक लागलो. मेळपाक गेले उपरांत तन्वीचो मोगी तिचे कडेन सारको उलयनाशिल्ल्यान तो आनीक कोणाचेर मोग करता असो तिका दुबाव आयलो. मनांत वेगवेगळे विचार येतनाच कांय दिसां आदीं हे तरणाटेच्या इन्स्टाग्रामचेर एक स्टोरी दिसली. ‘२५१ रुपया भरून करिअर आनी रिलेशनशिपची म्हायती जाणून घेयात’, अशें ते जायरातींत म्हणिल्लें. आपल्या इश्टाक आपलो करचे खातीर तन्वीन ते जायरातीचेर दिल्ल्या क्रमांकाचेर संपर्क केलो. २५१ रुपया भरून नोंदणी केली. उपरांत तन्वीन स्वताचो आनी आपल्या इश्टाचो फोटो आनी नांव धाडलें.
काळो जादू केल्ल्याचो दावो
पयशे आनी म्हायती धाडले उपरांत एका मनशाचो तन्वीक फोन आयलो. तुमच्या इश्टाचेर कोणें तरी काळो जादू केल्ल्याचें तिका सांगलें. ह्या काळ्या जादवाच्या प्रभावाक लागून तो तुमचे कडल्यान पयस गेला. तो तुमचे कडेन सारके वागयना, अशें सांगिना फुडें तन्वी ताच्या उलोवण्यान आडकत गेली. तन्वीन ताच्या उलोवपाचेर विस्वास दवरलो. इश्टाचेर जाल्लो काळो जादू काडून उडयतां, मात ताचे खातीर पयशे दिवचे पडटले. अशें तांणी सांगलें. ते प्रमाण तन्वीन ताका पयशे धाडले.
इश्टाचो संपर्क तुटला
उपरांत ऑनलायन पुजा आनी हे विधीचें कारण सांगून ह्या ज्योतिशीन तन्वी कडल्यान जायते फावटीं पयशे घेतले. साडे तीन लाख खर्च करूनय हे तरणाटेचे जिणेंत कांयच बदल घडूंक ना. मजगतीं, इश्टा वांगडाय कायमचो संपर्क तुटलो. मात फटोवप्यान ‘तुकां इश्टाचो फोन नक्की येतलो. आनीक कांय विधी करच्यो पडटल्यो आनी ताका ताचे खातीर राजस्थानाक येवचें पडटलें’ अशें सांगलें. आतां मात तन्वीक दुबाव आयलो. चवकशी केले उपरांत हो सगलो प्रकार फटींगपणाचो आशिल्ल्याचें तिच्या लक्षांत आयलें. उपरांत तिणें वाकोला पुलीस स्टेशनांत वचून कागाळ केली. पुलीस सध्या सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
