भांगरभूंय | प्रतिनिधी
खबरां संस्था
बर्मिगहॅमः राष्ट्रकुल खेळां सर्तींत भारतीय खेळगड्यांची पदक कामगिरी सुरूच आसा. सर्तीच्या धाव्या दिसा बॉक्सिंगांत भारतान तीन भांगरा पदकां जिखली. बायलांच्या 48 किलो वजनाच्या गटांत नितू घांगसान जाल्यार ते उपरांत अमित पंघालानूय निमणे फेरयेंत जैत मेळोवन भांगरा पदक मेळयलें. निखत जरीनने 50 किलो वजनाच्या गटात नॉर्दर्न आयलंडाच्या कार्ली मॅकनॉलाक 5-0 अशें हारोवन भांगरा पदक जोडलें. सध्याची संवसारीक जैतिवंत निखतान उपांत्य फेरयेचे मॅचींत इंग्लंडाची बॉक्सर सवाना अल्फियाक 5-0 अशें हारयल्लें. राष्ट्रकुलांतलें निखताचें हें पयलें भांगरा पदक आसा.
भारताच्या खात्यांत आतां 15 भांगरा पदकां जाल्यांत. 21 वर्सां पिरायेच्या नितू घांगसान निमणे फेरयेंत इंग्लंडाच्या डेमी-जेडाक हारयलें. ताच्या हल्ल्याक डेमी कडेन जाप नाशिल्ल्यान ताका सहजतायेन जैत मेळ्ळें. ताणे अदूं भारताक बॉक्सिंगांत पयलें भांगरा पदक मेळोवन दिल्लें, नितूच्या जैताक लागून भारताक वट्ट 41 पदकां मेळ्ळ्यांत
दादल्यांच्या फ्लायवेट बॉक्सिंगात 16 वर्सां पिरायेच्या अमित पंघालान इंग्लंडाच्या कियारन मॅकडोनाल्डाक हारयलें. राष्ट्रकुल सर्तींतलें तांचें हें पयलेंच भांगरा पदक आसा. गोल्ड कोस्ट हांगा जाल्ले राष्ट्रकुल सर्तींत ताका रुप्या पदकाचेर खोशी रावचें पडिल्लें. पोरूं ऑलिम्पिकांत ताका प्राथमीक फेरयेंत हार खावची पडिल्ली. मात राष्ट्रकुल सर्तींत ताणे कसलीच चूक करनास्तना फायनली मेरेन मजल मारली,
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
