भांगरभूंय | प्रतिनिधी
मडगांव, प्रतिनिधी : बाणावलेचे दर्यादेगेर पर्यटना खातीर आयिल्ले इंग्लंडचे इव्हाना मॉरिश (७९) हे बायलेचेर आयज एका बैलान हल्लो केलो. ह्या हल्ल्यात मॉरीश हिका पांयाक बैलाचें शिंग लागलां आनी तकलेकूय मार बसला. जखमीक हॉस्पिसिओंत उपचारा खातीर दाखल केल्या.
राज्यांतल्या पर्यटनाची वाड जावपा खातीर राज्य सरकार आनी पर्यटन खातें यत्न करता. पूण दर्यादेग वाठारांत येवपी देशी आनी विदेशी पर्यटकांक येवपी समस्या आजूनय तश्योच आसा. दर्यादेगेर भोवपाक गेल्या रस्ताद सुणी, हेडगीं गोरवां पसून धोको निर्माण जाता. तशेंच विवीध वस्तू विकप्यांचोय त्रास पर्यटकांक सोंसचो पडटा. बाणावले दर्यादेग लागसारचे दर्यादेगेर परदेशी बायलेचेर जाल्ल्या बैलाच्या हल्ल्याक लागून हेर सगळ्या समस्यांनी तोंड वयर काडलां.
इव्हाना मॉरिस ही इंग्लंडच्यान आपल्या इश्टां वांगडां गोंय भोंवडेर आयिल्ली. बाणावलेचे दर्यादेगेर आयज दनपरां दर्यार न्हावपा खातीर आयिल्ल्या इव्हानाचेर थंय भोंवपी बैलान फाटल्यानच्यान येवन नेटान धपको दिलो. ह्या वेळार बैलाचे शिंग इव्हानाच्या उजव्या पांयाक लागलें. तातूंतल्यान रगत व्हांवपाक लागलें. ह्या धपक्यान इव्हाना जमनीर कोसळ्ळी. तिचे तकलेकूय मार लागलो. पर्यटकाक बैल मारपाक वता तें पळोवन जीवरक्षक थंय आयले तेन्ना त्या बैलान तांचेरूय हल्लो करपाचो यत्न केलो. उपरांत बैल धांवत दर्यादेगेरच्यान वयले वटेन पळून गेलो.
थंय हाजीर आशिल्ल्यांनी जखमी बायलेक लागसारच्या शॅकांत व्हरून तिचो घावो नितळ केलो. उपरांत ऍम्बुलन्सीक आपयली आनी ते बायलेक दक्षीण गोंय जिल्हो हॉस्पिटलांत दाखल केली. हे घडणुके उपरांत पर्यटकांचे सुरक्षिततायेचो प्रस्न उप्रासला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
