भांगरभूंय | प्रतिनिधी
म्हापशें : रस्त्यार उबो आशिल्ल्या बैलाक वाटावपाच्या यत्नांत हडफड्यां जाल्ल्या अपघातांत एका दुचाकी चालकाक मरण आयलें. रायन आल्मेदा (४५, रा. सोरांटोवाडो, हणजूण) अशें मरण आयिल्ल्याचें नांव जावन आसा. ही घडणूक शेनवारा सांजेवेळार ‘सॉल्ट रेस्टॉरंट’ लागसार घडली.
मेळिल्ले म्हायती प्रमाण, रायन दुचाकी घेवन हडफडच्यान हणजूणच्या दिकेन वतालो. रस्त्या मदींच एक बैल उबो आशिल्लो. रायनाचे दुचाकीचो बैलाच्या पांयाक धपको बसलो. ह्या धपक्याक लागून रायनाचें दुचाकीवेल्यान नियंत्रण सुटलें आनी दुचाकी मुखारच्यान येवपी एक गाडयेक आदळ्ळी. हातूंत रायन गंभीर जखमी जालो. ताका रोखडोच १०८ ऍम्बुलन्सींतल्यान म्हापशेंच्या जिल्लो हॉस्पिटलांत दाखल केलो. मात उपचारा मजगतीं ताका मरण आयलें.
हे विशींच्या अपघाताची म्हायती हणजूण पुलिसांक मेळटाच ते घडणुके सुवातेर पावले. तांणी पंचनामो केलो. उपनिरीक्षक स्वप्नील नायक आनी हवालदार विशाल गांवस हांणी फुडलो तपास सुरू केला. आयतारा सकाळीं पोस्टमार्टमा उपरांत रायन हाची कूड तांच्या कुटुंबियांच्या ताब्यांत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
