बेहिशेबी उदकाचें प्रमाण हाडटले अर्द्यार

भांगरभूंय | प्रतिनिधी

फळदेसाय : 70 एमएलडी उदकाचो उणाव पयस जावपाचो अदमास

भांगरभूंय । प्रतिनिधी

पणजी : बेहिशेबी (नॉन रेवेन्यू वॉटर) उदकाचें प्रमाण 40 टक्क्यां वयल्यान 20 टक्क्यांचेर हाडपा सयत उदकाच्या नाशाडीचेर नियंत्रण दवरल्यार गोंयांत उदकाचो उणाव जाणवचो ना. एनआरडब्ल्यूचें प्रमाण 40 टक्क्यां वयल्यान 20 टक्क्यांचेर हाडपाची मोख आसा. हाका लागून सध्याचो 70 एमएलडी उदकाचो उणाव पयस जातलो, अशें पेयजल खात्याचे मंत्री सुभाष फळदेसाय हांणी सांगलें. पणजे संवसारीक उदक दिसाचे कार्यावळीत ते उलयताले.

संवसारीक उदक दिसा निमतान सोमारा भौशीक बांदकाम खात्याच्या कार्यालयांत खासा कार्यावळ जाली. हे निमतान पेयजल खात्याचे मंत्री सुभाष फळदेसाय मुखेल सोयरे म्हूण उलयताले. भौशीक बांदकाम खात्याचे प्रधान मुखेल अभियंते संदीप प्रभू चोडणेकार, पेयजल खात्याचे मुखेल अभियंते विश्वंभर भेंडे, गिरायक चळवळीचे रोलँड मार्टिन्स हाजीर आशिल्ले.

गोंयाक 700 एमएलडी उदकाची गरज आसा. खात्या वतीन 630 एमएलडी उदकाची पुरवण जाता. सध्या 70 एमएलडी उदकाचो उणाव आसा. गोंयच्या लोकसंख्येचो विचार केलो जाल्यार 500 ते 550 एमएलडी उदक पावपाक शकता. गळटी, चोरी तशेंच बेजापसालदारपणाक लागून 250 एमएलडी उदक फुकट वता. तशेंच 630 एमएलडी उदकांतल्या 40 टक्के उदकाचो हिशेब मेळना. एनआरडब्ल्यूचें प्रमाण 40 टक्के आसा. हें प्रमाण 20 टक्क्यां मेरेन उणें करपाची मोख आसा. हाका लागून उदकाचो उणाव पयस जावपा सयत 100 कोटींची येणावळ वाडटली, अशें सुभाष फळदेसाय हांणी सांगलें.

एक युनीट उदकाची पुरवण करपा खातीर सरकाराक 27 रुपया खर्च येता. गिरायकाक हेंच उदक 4.5 रुपया युनीट अशें दितात. हाका लागून एनआरडब्ल्यू आनी उदकाचे नाशाडीक लागून सरकाराक बरेंच लुकसाण सोंसचे पडटा. उदकाचो उणाव पयस करपा खातीर आमी प्रक्रिया प्रकल्प उबारतात. हाचेर कोटींनी रुपया खर्च करतात. एनआरडब्ल्यूचें प्रमाण उणें करपा सयत उदकाचो योग्य तरेन वापर करपाचेर भर आसतलो, अशें सुभाष फळदेसाय हांणी सांगलें.

उदकाची गळटी तशेंच चोरी बंद करपा खातीर खात्यान खासा यंत्रणेची वेवस्था करपाक जाय. तशेंच उदकाचो योग्य तरेन वापर करपा खातीर लोकां मदीं जागृताय करपाक जाय, अशी मागणी गिरायक हक्क मंचाचे रोलँड मार्टिन्स हांणी केली. ह्या वेळार बरी कामगिरी करपी खात्याच्या तंत्रीक कर्मचाऱ्यांचो भोवमान जालो.