भांगरभूंय | प्रतिनिधी
-कांपाला वयल्या 2.68 कोटींच्या मैदाना वयल्यान तापलें राजकारण
पणजी: कांपाला वयल्या मैदानाचेर 2.68 कोटींच्या बेसबॉल मैदाना वयल्यान परतून राजकारण तापतना दिसता. खेळां मंत्री गोविंद गावडे हांणी हे विशीं चवकशी करून अदीक म्हायती दितले, अशें सांगलें. जाल्यार आदले खेळां मंत्री बाबू आजगांकार हांणी हातूंत घोटाळो जाल्यार ताची चवकशी जावची आनी कितेंय भ्रश्टाचार जाल्यार योग्य ती कारवाय जावची, अशें म्हणलां.
खेळां मंत्री गोविंद गावडे हांचे कडेन हे संदर्भांत आपूण सपर्क केला. तांणी ह्या प्रकरणा विशीं चवकशी करतले, अशें सांगलें. ‘भांगरभूंय’ प्रतिनिधी कडेन उलयतना खेळां मंत्री गोविंद गावडे हांणी सांगलें, कांपालार बेसबॉल मैदानाचें काम आपूण खेळां मंत्री जावपा पयलीं जाल्लें. ते खातीर काडिल्ली निविदा, घेतिल्ल्यो वस्तू ह्यो आपूण खेळां मंत्री जावपा पयलीं सगले वेव्हार जाल्ले. मात ह्या मैदाना खातीर काडिल्ले टेंडर आनी हेर गजाली विशीं आपूण संबंदींत अधिकाऱ्यांक चवकशी करपाक सांगलां. सध्या हेे विशीं आपूण चड उलोवपाक शकना. मात हे विशीं पुराय चवकशी जाले उपरांतूच आपूण योग्य म्हायती दिवपाक शकता, अशें तांणी मुखार म्हणलें.
कांपाल मैदानाचेर 2.68 कोटी खर्च करून बेसबॉल मैदान बांदण्याच्या कामाक आदले मंत्री बाबू आजगांवकार हांच्या कार्यकाळांत सुरवात जाल्ली. सर्तीक कांय म्हयने उरिल्ले आसतना बेसबॉल प्रकार राष्ट्रीय खेळां सर्तींतल्यान वगळ्ळो. मात बेसबॉल मैदान अखेरच्या खिणा मेरेन तयार जावंक नाशिल्ल्यान जायते प्रस्न उपस्थीत जातात.
कांपाला वयल्या बेसबॉल मैदानाचें काम आपूण मंत्री जावपा पयलीं सुरू जाल्ले. हे विशीं आपूण संबंदींत अधिकाऱ्यां कडेन उलोवन चवकशेचे आदेश दिल्यात. टेंडर वा घेतिल्ल्या साहित्याचे योग्य चवकशी करतले.
– गोविंद गावडे, खेळां मंत्री
कांपाल मैदानाचेर बेसबॉल मैदानाच्या कामाक म्हज्याच कार्यकाळांत सुरवात जाली. मात उपरांत आपूण मंत्रीपदार नाशिल्लो. जर कोणाक ह्या कामांत घोटाळो जाला अशें दिसता जाल्यार ताची चवकशी जावची आनी सत आसा ते मुखार येवपाक जाय.
– बाबू आजगांवकार, आदले खेळां मंत्री
……………..
पयशे दिले, बेसबॉलाचें साहित्य गेले खंय?
खेळां मंत्री गोविंद गावडे हांणी 2023 त विधानसभेंत दिल्ले म्हायती प्रमाण कंत्राटदार आनी कन्सल्टन्सी सर्व्हिस खातीर मेळून 2 कोटी 68 लाख रुपया दिल्ले. हातूंतले अदमासे 3 लाख रुपया अजून आडावन दवरिल्लें. मात कंत्राटदाराक पुराय रक्कम दिल्यार बेसबॉल मैदाना खातीर लागपी साहित्य डिजिटल बोर्ड, प्रेक्षकां खातीर आसन वेवस्था ह्यो सगल्यो गजाली गेल्यो खंय, असो प्रस्न निर्माण जाता.
————–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
