भांगरभूंय | प्रतिनिधी
प्रशिक्षक ब्रेंडम मॅकलम आनी कॅप्टन बेन स्टोक्स हांच्या फुडारपणा खाला इंग्लंडाचो क्रिकेट पंगड पांच टॅस्ट मॅचीचे माळे खातीर भारतांत येत सावन भारतीय फिरकी सामकार इंग्लंडाच्या बेसबॉलाची जादू कितले मेरेन चलतली असोच प्रस्न चर्चेंत आशिल्लो. दर्जेदार भारतीय फिरकी बॉलिंगेचो गौरवशाली इतिहास आनी पडल्या डावांत 190 धांवड्यांची घसघशीत अशी आघडी घेतले उपरांत भारतीय पंगड हारतलो अशें कोणाकूच सपनांत लेगीत दिसलें नासत. पूण इंग्लंडाच्या ‘बेसबॉल’ आक्रमकतायेन तें घडयलें आनी हैदराबादांत पयलेच टॅस्टींत रोहीत शर्माच्या भारतीय पंगडाक हार घेवपाचो वेळ आयलो. दर्जेदार फिरकीच्या नेटार आपल्या मैदानार सामके प्रतिकूल परस्थितींत लेगीत व्हडली झुजां जिखपी भारतीय पंगडाचेर असो वेळ कित्याक येवचो हाची एकूच जाप दिवपाक जाता आनी ती म्हणल्यार फाटल्या वर्स- देड वर्सांत इंग्लंड पंगडान ब्रेंडम मॅकलमच्या मार्गदर्शना खाला आपणायिल्ली ‘बेसबॉल’ आक्रमकतेची रणनिती. मॅकलमान इंग्लीश क्रिकेट पंगडांत वर्स देड वर्सांत जो कितें बदल घडोवन हाडला तो पयले टॅस्टींत तांणी जे तरेन भारताचेर बाजू परतायली तें पळयल्यार पांच टॅस्ट मॅचींची ही माळ पदरांत पाडून घेवपा खातीर रोहीत शर्मा आनी ताच्या वांगड्यांक बरेज झुजचें पडटलें अशें चित्र दिसता.
सुमार दोनशें धांवड्यांनी फाटीं आसतनाय ओली पोप आनी टॉम हार्टली हांणी आपली जिगरबाज बॅटींग आनी बॉलिंगेन पंगडाक जें सपना सारकें जैत मेळोवन दिलें ताचे वयल्यान इंग्लंडाची ‘बेसबॉल’ जादू भारतीय फिरकीक भारी थारली असोच निश्कर्श काडपाक जाता.
भारताचे भोंवडेर येवपी पंगडाची ताकद आमच्या जादुई फिरकीच्या धसक्यान प्रत्यक्ष हांकां दाखल जावचे पयलींच अर्दी जाल्ली आसता हें नव्यान सांगपाची गरज ना. हाचे पयलीं जायते फावटी आमी तें अणभवलां. पूण पांच टॅस्ट मॅचींचे माळे खातीर भारतांत आयिल्लो इंग्लीश पंगड ताका आडवाद आसतलो हाचो संदेश पयलींच मेळिल्लो. ताचे फाटलें एकसुरें कारण म्हणल्यार प्रशिक्षक मॅकेलम हाणें भारतीय फिरकीक तितल्याच समर्थपणान तोंड दिवन बाजू परतावपा खातीर तयार केल्ली रणनिती. मॅकलमच्य आक्रमक रणनितीची खरें म्हणल्यार खर परिक्षाच आशिल्ली. पूण पयलेच टॅस्टींत मॅकलमच्या इंग्लंड पंगडान जी नेटान मुसंडी मारली ताचो विचार केल्यार हे परिक्षेंत ताका अपेक्षे परस चड येस मेळिल्ल्याचें दिसून आयलें. फाटल्या एक दोन वर्सांत सायबांच्या क्रिकेट पंगडान बेसबॉल मदल्या आक्रमक रणनिती आपणावन टॅस्ट क्रिकेटीचें मुखामळ बदलून उडयलां. अजाप म्हणल्यार तांच्या नवे रणनितीचो इंग्लंडाक फायदोच जालो हें फाटल्या कांय टॅस्ट मॅचींच्या निकाला कडेन पळयल्यार दिसता. फाटल्या 19 टॅस्टींतल्यो वट्ट 14 टॅस्टी इंग्लंडान जिखल्यात. हाचे वयल्यान मॅकलमाची बेसबॉल आक्रमकता इंग्लंडा खातीर बरीच येसस्वी थारल्या हें आनी वेगळ्या शब्दांत सांगपाची गरज ना. पयले टॅस्टींत हार दोळ्यां सामकार स्पश्ट दिसतना लेगीत ओली पोपान तळाच्या दोगां वांगडा बेसबॉलाची आक्रमकता दाखोवन भारतीय फिरकीचेर जो नेटान हल्लो केलो ताका तोड ना. ताका लागून 190 धांवड्यांची आघाडी घेवन आतां जैत आमचेंय अशा थाटांत खेळपी भारतीय पंगडाक बॅकफुटार वचून मॅच वाटावपा खातीर संघर्श करचो पडलो. मात तो वेळ मेरेन बरोच कळाव जाल्लो.
न्युझिलॅण्डाच्या ब्रेंडम मॅकलमाची भारतीय प्रेक्षकांक परत वळख करून दिवपाची गरज आसा अशें दिसना. इंग्लंडाचो हो नवो प्रशिक्षक आक्रमक बॅटींग करतना आमी सगल्यांनी पळयला, आनी आयपीएलांत जाल्यार ह्या बॅट्समनान आपली स्वताची अशी नांवमुद्रा कोरातींत केल्या. आयपीएलांतल्या पयल्या शेंकड्याचो मानकरी मॅकलमूच आशिल्लो. यत्न करून लेगीत ताची झंझावाती खेळी कोणाचेय यादींतल्यान वचपाक शकची ना. टॅस्ट क्रिकेट म्हणल्यार ओव्हरीच्याे ओव्हरी सवका आनी बेजार येवपी बॅटींग असो जो एक समज आशिल्लो तो हालिंसाराक पयस जायत चल्ला आनी ताचें स्रय ब्रेंडम मॅकलमा कडेन प्रामुख्यान वता. इंग्लंड पंगडाचो प्रशिक्षक जाले उपरांत मॅकलमान सगल्यांत पयलें खंयचें काम केलें जाल्यार टॅस्ट क्रिकेटींत बेसबॉलांतली आक्रमकताय कशी हाडपाक जातली हाचेर ताणें चड नेट दिलो आनी ताचो हो मंत्र बरोच येसस्वी थारला हें फाटल्या कांय मॅचींच्या निकाला कडेन पळल्यार लक्षांत येता. भारत भोंवडेर येवचे पयलीं तांची ही आक्रमकताय कितले मेरेन येसस्वी थारतली हे विशीं जायत्या जाणांक दुबाव आशिल्लो. कारण संवसाराचेर राज्य करपी भारतीय फिरकीन व्हडल्या व्हडल्यांक आपल्या बोटार नाचयिल्ल्याचो इतिहास सामकार आशिल्लो. फिरकीक पुराय अनुकूल थारपी भारतीय खेळपट्ट्यांचेर आमचे एका परस एक दिग्गज अशा आश्विन, अक्षर पटेल, कुलदीप यादव, रवींद्र जडेजा हांचे सामकार आक्रमकतायेन खेळप सोंपें नाशिल्लें. पूण हैदराबादेंत जें कितें घडलें तें पळयल्यार भारतीय फिरकीक कशें तोंड दिवचें हाचो धडोच इंग्लंडाच्या ओपी पोप आनी हेर खेळगड्यांनी संवसारांतल्या बॅट्समनांक दिला.
भारत आनी इंग्लंड हांचे मदली ही माळ पांच टॅस्ट मॅचींची आशिल्ल्यान कॅप्टन रोहीत शर्मा आनी प्रशिक्षक राहुल द्रवीड हांचे खातीर इंग्लीश बॅट्समनांक कशें आडावपाक जातलें हाचेर रणनिती तयार करून आतां मैदानांर देंवचें पडटलें. बेसबॉल रणनितीक मेळिल्ल्या अफलातून येसाक लागून हाचे फुडल्या मॅचींनी तीच आक्रमताय स्विकारून इंग्लीश बॅट्समन फिरकीचेर नेटान हल्लो करपाक शकतात. अशा वेळार हैदराबादची पुनरावृत्ती जावची ना हाची दक्षताय बाळगुवची पडटली. रिव्हर्स स्वीप आसूं वा अपर कट अशे टॅस्ट क्रिकेटींत केन्नाय तरी दिसपी शॉट आतां सर्रास दिसपाक लागल्यात आनी हैदराबादेंत क्रिकेट संवसाराक ते पळोवपाक मेळ्ळे. टॅस्ट क्रिकेट काळा प्रमाण बदलपाक लागला हाची देख हैदराबाद टॅस्टीन दिली. 196 धांवड्यांची अफलातून खेळी करपी ओली पोपान ज्या शॉटांची बरसात केली ती टॅस्ट क्रिकेटीक जाय तशी नाशिल्ली अशें कोणेय कितलेंय म्हणूं पूण टॅस्ट क्रिकेट लेगीत चमकदार जावपाक शकता हेंच इंग्लीश पंगडान वेगळ्याच आक्रमकतायेन दाखोवन दिलां. भारतीय बॅट्समन, बॉलर आनी फिल्डरांनी केल्ल्या चुकांक लागून आमच्या पदरांत हार आयली हीं कारणां सारकीं आसलीं तरी इंग्लंडाचे आक्रमकतायेक लागून एका फाटल्यान एक अश्यो चुको जायत गेल्यो आनी पदरांत हार आयली हें मानून घेवचेंच पडटलें. विराट कोहलीची गैरहाजेरी दिसून आयली. पूण ज्यो रूट आनी नवो फिरकी बॉलर टॉम हार्टली हांचे सामकार आमच्याच खेळपट्टीर रोहीत, राहूल, श्रेयस, शुभमन, जयस्वाल हाचें पांय कित्याक लटपटले हें कळपाक मार्ग ना. इंग्लंडाचो बेसबॉल पवित्रो पळयल्यार माळेंत खरी चुरस तयार जावपाक शकता. पूण तांकां बचावाचो पवित्रो घेवचो पडचो हे खातीर भारतीय पंगडाकूय आपली रणनिती बदलची पडटली…
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
