भांगरभूंय | प्रतिनिधी
पणजीः स्मार्ट सिटीचे रस्ते पुराय जाले उपरांत शाराच्या रस्त्यांचेर येरादारी सुटसुटीत जातली अशी आस्त पणजेच्या लोकांक आशिल्ली. पूण तीन म्हयने जाले उपरांत लेगीत पणजे कोंयडी अजूनय आसा. हाका मुखेलपणान रस्त्यार बेशिस्त पार्किंगाक लागून जालां. पार्किंग नाशिल्ल्यान वाहनां रस्त्या कुशीक, पे पार्कींग वाठारांनी डबल पार्किंग, रस्त्याच्या दोनूय वटांनी गाडयो पार्क करून सुवात आडावप हाका लागून शारांत येरादारीची कोंयडी वाडत आसा.
18 जून, आत्माराम बोरकार ह्या मुखेल रस्त्यांचेर येरादारीची कोंयडी जाता. तशेंच पे पार्किंगाची सुविधा पालिका म्हामंडळान दिल्या. पूण थंय पार्कींग केल्ल्या वाहनां फाटल्यान चड करून वाहनां उबीं केल्ली आसतात. हाका लागून ह्या रस्त्यांचेर सदांच येरादारीची कोंयडी जाता. पूण चडशे फावट हांगा पुलीस नसतात. देखून अशा वाहन धनयांचेर कसलीच कारवाय जायना.
दयानंद बांदोडकार रस्त्याकय ह्या कारणाक लागून येरादारींत आडमेळीं येतात. हांगा कॅसिनो मुखार, ईएसजी मुखार गाडयो रस्त्या कुशीक पार्किंग नाशिल्ल्यान उबीं आसतात. देखून दिवजा सर्कलांतल्यान लेगीत येरादारी सावकाश जाता. कांय सुवातींनी थळाव्या बशींक बेकायदेशीर थांबो दिल्ल्यान ही समस्या अदीकूच वाडटा. मिरामारांतल्या शारदा मंदीर स्कुला लागसार वाहनां पार्क केल्ल्यान सकाळीं आनी दनपारां येरादारीची कोंयडी जावपाक लागल्या. तशेंच पणजी बाजार वाठारांत डबल पार्किंगाक लागून रस्त्याक आडमेळीं येतात.
पणजी शारांत स्मार्ट सिटीचे रस्ते जरी पुराय जाल्यात तरी संत इनेज वाठारांतले चडशे रस्ते अजून बांदकाम चालू आसात. फाटले तीन म्हयने हें काम पुराय जावंक ना. काम चालू आशिल्ल्यान जेसीबी आनी हेर व्हड वाहनां हांगा व्यस्त आसात. तेच प्रमाण रस्त्याच्या दोनूय वटांनी गाडयो उबी केल्यारय हांगाच्या येरादारींत आडमेळीं येतात. पूण हांगा लेगीत पुलीस वा येरादारी पुलीस नासतात. नो पार्किंगांत उबीं आशिल्ल्या गाडयांचेर खर कारवाय करची अशी मागणी थळाव्या लोकां कडल्यान जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
