बेवारशी गाडयो

भांगरभूंय | प्रतिनिधी

मनीस, जनावरां बेवारशी आसतात. गाडयोय आसतात. नवी गाडी घेवपाची जाली काय संबंदीत व्यक्ती ती गाडी शोरुमांत वा कोणाकूय उण्या पयशान विकता. जांकां नवी गाडी परवडना, ते ती विकत घेतात. पूण, कांय गिरेस्त मनीस पोरणी गाडी खंयच्याय रस्त्यार वा आपले इमारती सकयल बेवारशी स्थितींत उडयतात. थोड्या गाडयांनी कोणाक तरी अपघातांत मारिल्लो आसता वा कांय गाडयांचे धनी वा ताच्या कुटुंबांतलो एखादो ते गाडयेक लागून मेल्लो आसता. कांय शारांनी तर ह्या गाडयांचे धनी कोण तेंय कोणाक खबर नासता. ते येतले आनी गाडी व्हरतले, हाची वाट सगलेच पळयतात आनी मागीर स्वराज्य संस्था गाडी जप्त करून कावलाक काडटात. सरकारी गाडयोय बेवारशी आसात हें विशेश. हालींच वापरुं येता अश्या पोरण्या गाडयांची पर्वरे पावणी जाल्ली. काल मुरगांव पालिकेन शारांत दवरिल्ल्यो गाडयो काडपाची मोहीम परतून सुरू केली. कांय दुचाक्यो काडल्योय बी. अडेज वर्सां पयलीं तांणी 70 गाडयो जप्त केल्ल्यो. ही मोहीम वास्कोच न्हय, तर पुराय गोंयांत चालीक लावंक जाय. शारांनी आनी गांवांनीय! कावलाक आयिल्ल्यो गाडयो, एकाच जाग्याचेर वर्साचीं वर्सां पडून आशिल्ल्यो कितल्योशोच गाडयो मेळटल्यो. जंय येरादारीक आडमेळीं येनात, थंय दवरिल्ल्या गाडयांचेरूय कारवाय केल्यार बरी.
केंद्र सरकारान 20 वर्सां परस पोरणी खाजगी गाडी आनी 15 वर्सां परस पोरणी वेवसायीक गाडी, पुराय तपासणी करूनच रस्त्याचेर हाडची अशें म्हणिल्लें. तांणी गाडी कावल धोरणूय जाहीर केल्लें. बऱ्याच राज्यांनी ही येवजण आपणायल्या. मात ती चालीक लायल्याच अशें ना. गोंयांतूय ती आसा. पणजे पालिकेन पोरूं शारांत मेळत थंय दवरिल्ल्यो गाडयो जप्त करतले, अशें जाहीर केल्लें. आठ दिसां वयर एकाच जाग्यार पार्क केल्ली गाडी बेवारशी मानतले आनी उपरांत नोटीस दितले अशेंय जाहीर केल्लें. तरीय गाडयेचो धनी हालचाल करिना जाल्यार गाडी कावलाक काडटले अशेंय म्हणिल्लें. गोंयांत दरेका शारांत 25 ते 250 अनाथ, बेवारशी गाडयो दिसतात. एका पणजे शारांतूच अडेचशें वयर गाडयो आसात खंय. म्हणटकच गोंयांत कितल्यो गाडयो आसतल्यो ताची फक्त कल्पना करची. एका अभ्यासा प्रमाण, राज्यांत 10 लाखां वयर गाडयो पोरण्यो जाल्यात. तातूंत सात लाखां वयर दुचाकी आसात. थोड्या बशिंकूय 25 वर्सां जावन गेल्यांत. रस्त्याचे कुशीक म्हयन्याचे म्हयने उब्यो आशिल्ल्यो गाडयो, खटाऱ्यो गाडयो जप्त करतले, तें बरें आसा. पूण नव्या गाडयांचें कितें?
आयज दरेका शारांत, गांवांतूय पार्किंगाची समस्या आशिल्ल्यान गाडयो मेळत थंय उब्यो केल्ल्यो दिसतात. थोडे तर मुफत पार्किंगाच्या जाग्यांत 2- 2 दीस गाडी उबी दवरतात. दोनूय वटेन पार्किंग केल्लें आसतनाय बरेचजाण मदीं तिसरी रांक करतात. गांवांतल्या अशीर रस्त्यां देगेक बस, टेंपो वा मोटार दवरल्यार येरादारीक अडचण जाता. एकोशी, पोंबुर्फा सारक्या सामक्याच अशीर रस्त्यांचेरूय गाडयो पार्क केल्ल्यो दिसतात. रस्त्या कुशीक गाडी दवरली काय पार्किंगाचीच समस्या निर्माण जायना, तर अपघात जातात. कांय जाण ते गाडयेचो गुदांवा सारको उपेग करतात. थोडे अनैतीक कामां खातीर. गाडयांनी सरपटपी जीव, म्होंवा मूस रावपाक शकतात. सरभोंवणच्या लोकांक हो धोको.
स्वराज्य संस्थांनी बेवारशी गाडयांची वळेरी तयार करपाक जाय. रस्त्याचेरूच न्हय, तर मेकळ्या जाग्यार, मैदानाचेर दवरिल्ल्यो गाडयो तांणी तपासूंक जाय. त्यो कावलाक काडपाक जाय. अर्थांत संबंदीत गाडयेच्या धनयाक विचारूनच. सरकारी गाडयांची पावणी जाली, तशी लोकांच्या खाजगी गाडयांचीय पावणी जाहीर करची. म्हणटकच लोकांचेर रस्त्या कडेन गाडयो सोडपाचो वेळ येवचो ना.