बेवफा सनम

भांगरभूंय | प्रतिनिधी

नोकरी करपी बायलां विशीं हो दुबाव जावपाक कारण म्हणल्यार हें मौर्य प्रकरण. अर्थांत हाचे पयलीं असलीं प्रकरणां जावंक नात, अशें न्हय.

चडश्यो बायलो ‘रांदात, वाडात, उश्टीं काडात’ ह्याच चक्रांत घुंवत आसात. फाटल्या 50 वर्सांत गोंयांत घराघरांतल्यो बायलो शिकपाक लागल्यो, स्वताच्या पायांचेर उब्यो रावपाक लागल्यो. 1990 उपरांत हाका चड गती मेळ्ळी. मात अजून कांय राज्यांनी बायलांचें स्थान रांदचे कुडींतूच आडकलां. शिकपाची इत्सा आसूनय तांचे घरचे दादले तांकां शिक्षणा पसून पयस दवरतात. असल्यांचोच आंकडो व्हड आसा. पूण, हेर कडेन बायलो शिकल्यात. दादल्यांच्या खांदाक खांद लावन वावुरतात. शालेय परिक्षांनी तर सदांच चलयोच मुखार आसतात. बायलांक मुखार काडपी समाजसुदारक जावन गेल्यात. ज्योतिबा फुले, महर्षी धोंडो केशव कर्वे, राजा राममोहन राॅय, डाॅ. आंबेडकर, रघुनाथ कर्वे, ईश्वरचंद विद्यासागर…. कितलेशेच. बायलोय बायलांचेर जावपी अन्याया आड झुजल्यात. सावित्रीबाई फुले हांकां तांचे घरकार ज्योतिबा हांणी शिकयली, गोपाळ जोशीन आपले बायलेच्या आनंदीबाईच्या फाटल्यान लागून तिका दोतोर केली.
आयज पसून तसले जिद्दी लोक आसात. अर्थीक, समाजीक, कुटुंबीक संकश्टां, विरोध सोंसून तांणी घरकान्नींक शिकयल्यांत, पूण तातूंतल्या कांय बायलांनी घोवाच्या माथ्यार मिरयां वाटपाक सुरवात केल्या. हो देशभर चर्चेचो विशय थारला. खास करून सोशल मिडियाचेर. हालींच उत्तरप्रदेशांतली उपविभागीय दंडाधिकारी ज्योती मौर्य हांची काणी गाजली. ह्या प्रकरणाच्यो दोन बाजू आसात. आलोक मौर्यान ज्योती कडेन 2010 त लग्न केलें. तिका शिकपाची आवड आसा, तें पळोवन ताणें रीण काडून तिका शिकयली. 2016 त उत्तर प्रदेश नागरी सेवा परिक्षेंत ती सोळावी आयली. नोकरी लागतकच ती मिटिंग आसा अशें सांगून परत परत लखनौ वताली. दुबाव मारिल्ल्यान आलोकान फाटलाव केलो, तेन्ना तिणें होमगार्ड कमांडंट मनीश दुबे हो आपलो मोगी अशें स्पश्ट सांगलें. आतां ती घरा येवपाक तयार ना, अशें आलोकाचें म्हणणें. तर ज्योती आरोप करता, ताणें आपणाक फटयलो, ताचे घरचीं त्रास करतात. दोगांयनी एकमेकांक आनी दुबेन आलोकाक धमकी दिल्ल्याचें छापून आयलां. आतां प्रकरण पुलिशेंत, कोर्टांत पावलां. भ्रश्टाचार, व्यभिचार, खुनाची धमकी अशीं जायतीं मोडणां मेळ्ळ्यांत…
…. मात ह्या प्रकरणाचो बऱ्याच कुटुंबांचेर परिणाम जाला. कारण युपी, बिहारांत बरेच दादले बायलांक शिक्षण, नोकरे खातीर उर्बा दितात. तांच्या मनांत आपलीय बायल आतां कोणा बरोबर पळून वचत, चड शिकली जाल्यार तिका आपली लज दिसत, असो दुबाव येवपाक लागला. जीं बायलां मुखार शिकपाक सोदतात, तांकांय शिकपाक मेळत काय हाचो हुस्को जावपाक लागला. सध्या सोशल मिडियाचेर ज्योती मौर्य बेवफा है, असो संदेश फिरपाक लागला. झारखंडांत एका मजूरान घरकान्न नर्शीची नोकरी मेळत सावन घरा येवपाक तयार ना, अशी कागाळ केल्या. बक्सर (बिहार) गांवांतल्या पिंटू कुमारान प्रयागराजांत शिकपी आपले बायलेक बेगोबेग परत आपयल्या. ती नागरी सेवा परिक्षेचो अभ्यास करता. तिका सरकारी नोकरी मेळत जाल्यार तिची ज्योती मौर्य जायत अशी भिरांत ताका दिसता. आॅनलायन, आॅफलायन कोचिंग दिवपी खान सर हें नांव सगल्यांक खबर आसा. तांच्या युट्यूब चॅनलाचे लाखांनी फाॅलोवर आसात. तांच्या एकल्याच्याच क्लासींतल्यान 93 बायलांचें नांव तांच्या घोवांनी काडलां. नोकरी लागल्यार ती आपल्याक सोडून वतली अशें तांकां दिसता. म्हणटकच एके घडणुकेन कितल्या लोकांच्या मनांत दुबाव निर्माण केलो आनी कितल्या जाणांचीं सपनां मातये भरवण जालीं तें पळयात. ही पिशेंपणां अशेंय कोणाक दिसतलें.
बायलांक चार वण्टी आडूच दवरूंक सोदपी संकुचीत विचारांचे दादले हाचें समर्थन करपाक लागल्यात. नोकरी करपी बायलां विशीं हो दुबाव जावपाक कारण म्हणल्यार हें मौर्य प्रकरण. अर्थांत हाचे पयलीं असलीं प्रकरणां जावंक नात, अशें न्हय. पूण प्रसारमाध्यमां, सोशल मिडियाक लागून हें प्रकरण रोखडेंच देशभर पावलें. त्रास काडून जिद्दीन स्वता चडांत चड शिक्षण घेवप वा बायल, भयण हुशार आसल्यार तांकां शिकोवप ही युपी, बिहारांतल्या गरीब कुटुंबांची परंपरा. जे शिकपाक ढ आसात, मानायपण, सफाय कामगाराची नोकरी करतात ते बायलांक शिकयतात. तिका आत्मसन्मान मेळचो आनी संवसाराकूय चार पयशे मेळचे ह्या हेतान. मात आतां मौर्य प्रकरणान ताचेर माती पडत म्हूण भिरांत. सुरवात जाल्या. कारण दुबावाक खंय वखद नासता.