भांगरभूंय | प्रतिनिधी
बेळगांव, खबरां संस्था : भीमगड अभयारण्यांतल्या लोकांक योग्य भरपाय दिवन तांचें टप्प्याटप्प्यांनी स्थलांतर करतले, अशी म्हायती कर्नाटकाचे रान आनी पर्यावरण मंत्री ईश्वर खंडे हांणी दिली. सोमारा रातीं विधिमंडळ अधिवेशनाचें काम जाले उपरांत तांणी रान खात्याच्या वरीश्ठ अधिकार्यां वांगडा तळेवाडी ग्रामस्थांची भेट घेवन म्हणणें आयकून घेतलें.
खंडे हांणी सांगलें, दरेका कुटुंबाक १५ लाख रुपयांची भरपाय दिवपा खातीर सरकार तयार आसा. रानांत रावपी लोकांनी स्वयं प्रेरणेन स्थलांतरा खातीर संमती दाखोवची.
सध्याचे स्थितींत भीमगड अभयारण्याच्या वाठारांत १३ वाडे आनी गांव आसात. थंय ७५४ कुटुंबांनी ३०५९ लोक रावतात. तातुंतले १५३० दादले आनी १४४३ बायलो. सगळीं कुटुंबां स्थलांतरा खातीर तयार आसात. असल्या गांवांचें स्थलांतर करपा खातीर पुनर्वसन भरपाय दिवपाक कार्यवाय हातांत घेवपाची सुचवणी तांणी अधिकार्यांक दिली. रानांत रावप्यांचें स्थलांतर करपा खातीर दिवपी भरपायेची रक्कम अपात्र लोकांक दिवची न्हय, हाचे कडेन लक्ष दिवचें. तशेंच संरक्षीत रानाच्या भायर जमीन विकत घेवन रानांत रावप्यांनी आपले नवे जिणेक सुरवात करची. हाका लागून भरपाये खातीर मेळपी रक्कम बँकेंत ठेवीच्या स्वरुपांत दवरची, अशी सुचवणी तांणी ग्रामस्थांक दिली.
गांव आनी कुटुंबांचो आंकडो
कोंगाळा ६३, पास्तोली ३६, गवळीवाडो ९०, अबनाळी ८१, जामगाव ८२, हेमडगा १२८, तळेवाडी १३, देगांव ३१, पाली ७३, मेंडील ४०, कृष्णापूर १२, होल्ड ७ आनी आमगाव ९८ कुटुंबां आसात, अशी म्हायती अधिकार्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
