भांगरभूंय | प्रतिनिधी
पोरण्यां हिंदी सिनेमांनी दोतोराक एक डायलाॅग आसतालोच. ‘अब इन्हे दवा नहीं दुवा की जरुरत है, अब सब उपरवाले के हाथ मे है….!’ आमची जिवनदायिनी म्हादयमाय सद्यां आयसीयूंत आसा आनी तिका आतां फक्त न्यायालयूच वांचोवपाक शकता, अशें चित्र बेळगांवचे जाहीर सभे उपरांत वयर सरलां. ‘अब सब कोर्ट के हाथ में है’, अशें दिसता. चड करून फुडल्या 13 फेब्रेराक म्हादयचेर सर्वोच्च न्यायालयांत सुनावणी जावपाची आसा. मुखार थंय कितें निर्णय जाता, तो पळोवपाचो. तो आमच्या विरोधांत वच्चो न्हय, इतलेंच मागुया. कारण म्हादयचेर उत्तर गोंय आनी द. गोंयांतलीय जीण अवलंबून आसा. फकत मनशाचीच न्हय, तर मोनजातीचीय. सैमूय म्हादय बगर बावतलो. फुडल्या एप्रीलांत कर्नाटकांत विधानसभा वेंचणुक जातली. ते खातीर सगलेच आपलो पक्ष सत्तेर येवचो म्हूण डावपेच आंखपांत गुल्ल जाल्यात. केंद्रीय गृहमंत्री अमित शहा कर्नांटक भोंवडेर आयिल्ले, तो वेंचणुकेच्या प्रचाराचोच एक वांटो. “कितलीशींच वर्सां आडकून उरिल्लो म्हादय उदकाचो वाद केंद्रांतल्या भाजपा सरकारान सोडयला. उदक वळोवपाक दिवन भाजपान उत्तर कर्नाटकाची तान भागयल्या. आतां पिवपाचें उदक मेळटलें. शेतकारांकूय जाय तितलें उदक मेळटलें. कर्नाटकाचे मुख्यमंत्री बसवराज बोम्मय हांणी गोंयांतल्या भाजपा सरकाराक वांगडा घेवन समजिकायेन म्हादयचें उदक वळयलें”, अशें श्री. शहा उलयले. “भाजपाक लागून कर्नाटकाक म्हादयचें उदक मेळ्ळें. काँग्रेस अध्यक्ष सोनिया गांधीन गोंयांतले सभेंत कर्नाटकाक म्हादयचो थेंबूय मेळचो ना, अशें म्हणिल्लें”, हाचीय यादूय गृहमंत्र्यान करून दिली. तिनूय कडेन भाजपाचें सरकार आसा. खंयचोय निर्णय एकल्याक बरो जाल्यार दुसऱ्याक वायट थारपी आसूं येता, तेन्ना सुवर्णमध्य काडून दोनूय वटांच्या लोकांक धादोशी करपाचें आसता. पूण हांगा म्हादय प्रस्नाचेर दाटिल्ल्या काळखी मळबांतल्यान गोंयचेर नेमकें क्षेपणास्त्र येवन आदळ्ळां आनी ताका लागून घावो आनीक व्हडलो जाला. येवपी दिसांनी राजकारणा वांगडा राज्यातलें समाजकारणूय तापपाची शक्यताय आसा. कारण पंचायतीच्यो कालच्यो ग्रामसभा. भोवतेक सगल्या पंचायतींनी म्हादय विशीं हुस्को उक्तायला. तातूंत, अमित शहा हांच्या विधानाचो निशेध, राज्य- केंद्र सरकाराचो निशेध, म्हादय विशीं जागृताय अश्या विशयांचो आसपाव आसा. हातूंतल्यो चडश्यो पंचायती सरकार पक्ष समर्थक आसात, हें विशेश. आतां भाजप विरोधक, एनजीओ तशेंच पर्यावरणवादी परतून नेटान कामाक लागतले. म्हणटकच म्हादयच्या आंदोलनाक नेट येतलो, हातूंत दुबाव ना. आनी तो म्हादय मायचे हिताचे नदरेन योग्यूच आसा.
म्हादय संबंदीच्या कर्नाटकाच्या डीपीआराक केंद्र सरकारान मंजुरी दिल्या. पूण पर्यावरण, रान आनी हेर खात्यांचे दाखले मेळपाचे आसात. ताका गोंय सरकार विरोध करपाक शकता. म्हादयच्या संरक्षणा खातीर आमी बांदिल आसात, अशें मुख्यमंत्री डाॅ. प्रमोद सावंत हांणी म्हणलां खरें. पूण गृहमंत्र्यांच्या जाहीर वक्तव्यान आतां कर्नाटकाक आनीक बळगें मेळ्ळां. तातूंत वेंचणूक. आमचे दोन, तांचे 28 लोकसभा खासदार. कर्नाटकांतले निकाल सरकार पक्षा वटेन लागपाक केंद्र कर्नाटकाक, थंयच्या मतदारांक फुडले तीन म्हयने तरी मांडयेर बसयतले आनी तांची अपुरबाय करतलें, हें स्पश्ट दिसता. थंयचो काँग्रेस आनी हेर पक्षूय म्हादयचें उदक वळोवपाचे वटेन आसात. निमणें समाजकारणा परस राजकारण श्रेश्ठ थारलां. आतां ‘बेळगांव डिक्लेरेशना’ उपरांत तर ही म्हादय लढाय आमचे खातीर आनीक कठीण जाल्या.
गोंयांतले एकान एक विरोधक तिडकल्यात. दोन दीस टिका करून जाली. आतां मुखार कितें करपाचें ते विशीं झुजा पांवड्याचेर पावलां उखलपाक जाय. सभाघर समितीची बसका बेगीन आपोवची, त्या वेळार मुख्यमंत्र्यांकूय हजर रावपाक सांगचें, अशें पत्र गोवा फाॅरवर्डान उदका स्रोत मंत्र्यांक बरयलां. केंद्र सरकार म्हादय प्रस्नाचेर कर्नाटकाक कसलेच दाखले दिवचो ना, हे खातीर कितें करपाक मेळटलें हाचेरूय उपाय काडचे पडटले. विरोधक म्हणटात, सगल्या 40 आमदारांनी राजिनामो दिवचो. पूण, हें दिसता तितलें सोंपें न्हय. तरीय म्हादयच्या निमण्या उदका थेंब्या खातीर आमकां गोंयकारांक आतां आपापले परीन झुजचें पडटलें. पक्ष, धर्म, प्रांत, संघटना पळयनासतना. सगले मतभेद, मनभेद विसरून!! हो दुसरो ओपिनियन पोल अशेंच समजुया आनी कामाक लागुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
