भांगरभूंय | प्रतिनिधी
जोयडा : बेळगांव- गोंय राष्ट्रीय महामार्गावेल्या तीनय घांट (पालडा रस्तो क्रॉस) वाठारांतल्या पुला सकयल उदकांत एके बायलेची कूड सांपडिल्ल्यान ह्या वाठारांत खवदळ जाला. अंगणवाडी सेविका म्हणून कार्यरत आशिल्ली अश्विनी बाबुराव पाटील (50, रा. नंदगड, ता. खानापूर) अशें ते मरण आयिल्ले बायलेचें नांव. तिचे तकलेर आनी मुखामळार गंभीर जखमो आशिल्ल्यान हें प्रकरण खुनाचें आशिल्ल्याचो दुबाव आसा.
हे विशीं मेळिल्ले म्हायती प्रमाण, अश्विनी पाटील ही 2 ऑक्टोबराक सांजेवेळार केक्केरीच जात्रेक गेल्ली. देवदर्शन घेवन परततना ती बिडी हांगा देवली, मात उपरांत ती घरा पावूंकच ना. तिच्या पुतान दुसरेच दिसा नंदगड पुलिशेंत ती बेपत्ता जाल्ल्याची कागाळ केली.
मजगतीं, शेनवारा रातचें महामार्गावेल्यान वचपी एका ड्रायव्हराक पुला सकयल उदकांत एक कूड हुबतना पळयली. तांणी रोखडीच रामनगर पुलिसांक हे विशीं म्हायती दिली. पुलिसांनी थंय पावून कूड उदका भायर काडली.
हो प्रकार खुनाचो आसतलो, असो पुलिसांक अदमास आसा. मात हे घडणुके उपरांत कूड सांपडिल्ल्या वाठारांतल्यान तिच्या मोबायलावेल्यान दोन मॅसेजी मेळ्ळ्यात. हाका लागून पुलीस घुस्पल्ले वरीं जाल्यात. एके मॅसेजींत ‘हांव आत्महत्त्या करतां’, जाल्यार दुसरे ‘ हांव बंगळुरू वता’ असो उल्लेख आसा. ह्या मॅसेजींक लागून हो प्रकार आत्महत्त्येचो काय खुनाचो असो पुलिसांक दुबाव आसा. ह्या प्रकरणांत पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
