भांगरभूंय | प्रतिनिधी
बेळगांव : बेळगांवां एक विचीत्र प्रकार घडलो. शींया पसून वाटोवपाक घातिल्ले कोळशाचे शेकोटीक लागून तिगांनी आपलो जीव वगटायलो.
हे विशीं चड म्हायती प्रमाण, बेळगावच्या अमन नगर वाठारांत १८ नोव्हेंबराक रातचें शीं लागचें न्हय म्हणून चार तरणाटे एके बंद कुडींत कोळशांची शेकोटी पेटोवन न्हिदले. हातुंतल्या तिगांक घुस्मटून मरण आयलें. जाल्यार एकल्याची अवस्था गंभीर आसा. शेकोटींतल्यान भायर येवपी कार्बन मोनोऑक्सायड वायूक लागून तांकां ऑक्सिजन मेळनाशिल्ल्यान हे चारूय तरणाटे न्हिदेंतूच घुस्मटले. रेहान माटे (२२), मोईन नालबंद (२३), सर्फराज हरपनहळ्ळी (२२) अशीं मरण आयिल्ल्यांचीं नांवां आसात. जाल्यार शाहनवाज हरपनहळ्ळी (१९) हाका गंभीर अवस्थेंत बेळगांव जिल्लो हॉस्पिटलांत दाखल केला.
हे विशीं म्हायती मेळटांच, बेळगांव उत्तरचे आमदार राजू सेट, अमन सेट, पुलीस निरीक्षक बी. आर. गडेकर आनी आपत्कालीन बचाव पंगड घडणुके सुवातेर दाखल जाले. अमननगर वाठारांत घडिल्ले हे घडणुकेक लागून ह्या वाठारांत दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
