भांगरभूंय | प्रतिनिधी
पांच राज्यांतल्यान वेंचीक व्यक्ती मदीं निवड
सावयवेरें: वेरें-वाघुर्में ग्रामपंचायतीचे आदले सरपंच आनी कुट्टीचे आदले जिल्हो पंचायत वांगडी तशेंच समाजसेवक मोहन महादेव वेरेंकार (सावयवेरें) हांकां तांच्या समाजकार्याची दखल घेवन तांकां राष्ट्रीय आदर्श सरपंच गौरव पुरस्कार भेटयलो. दिल्ली, गुजरात, महाराष्ट्र, कर्नाटक आनी गोंय अशा पांच राज्यांतल्यान वेंचीक व्यक्ती मदीं निवड करून वेरेंकार हांकां हो पुरस्कार हालींच बेळगांवी धर्मनाथ भवनांत भेटयलो. हो पुरस्कार राष्ट्रीय ग्रामीण विकास फावंडेशन आनी एकात्मीक समाज कल्याण सोसायटी, बेळगांवी हांचे वतीन पुरस्कृत केल्लो.
नामनेचे उद्देगपती सीमा इंग्रोळी, कोल्हापूर म्हानगरपालिकेचे म्हापौर राजू शिंगाडे, कर्नाटकचे जिल्हो कमांडंट अरविंद घट्टी, जनसंपर्क अधिकारी परशुराम तशेंच हेर मानेस्तांचे हाजिरेंत विशेश सन्मान पत्र, सन्मानचिन्न, म्हैसुरी फेटो, चंदनाचो कायमस्वरुपी हार आनी भारत सरकाराचें केंद्रीय मंत्री हांचे कडल्यान अभिनंदन पत्र भेटयलें.
ह्या सुवाळ्याक विवीध मळा वेल्या महनीय व्यक्तींची हाजेरी आशिल्ली. मोहन वेरेंकार हांणी राष्ट्रीय पुरस्काराचें स्रय सावयवेरें आनी कुट्टी वाठारांतल्या मतदारांक तशेंच सगल्या ग्रामस्थांक दिलां.
मोहन वेरेंकार हे सेगीत 30 वर्सां सावयवेरें ग्रामपंचायत क्षेत्रांत आनी उपरांत पांच वर्सां कुट्टी जिल्हो पंचायत क्षेत्रांत मेळून वट्ट 35 वर्सां निसुवार्थीपणान समाजकार्य केलां. त्या कार्याची दखल घेवन हाचे पयलीं तांकां दिल्लींतल्या विज्ञान भवनांत आदले प्रधानमंत्री डॉ. मनमोहन सिंग, काँग्रेसीची आदली अध्यक्षा सोनिया गांधी हांचे हाजिरेंत केंद्रीय मंत्री अगमा संगमा हांचे हस्तुकीं भोवमान जाल्लो.
केंद्रीय मंत्री डॉ. सी. पी. जोशी हांचे हस्तुकीं तांचो दुसरे फावटी दिल्लींत भोवमान जाल्लो. तशेंच आदर्श सरपंच म्हूण तांकां पुरस्कारूय फावो जाला. सावयवेरें ग्रामस्थां वतीन आदर्श सरपंच म्हूण तांचो भोवमानूय केल्लो. तशेंच गोंयचे आदले मुख्यमंत्री दिगंबर कामत आनी सर्गेस्त मनोहर पर्रीकार हांचे हस्तुकीं लेगीत तांचो भोवमान जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
