भांगरभूंय | प्रतिनिधी
पणजी : बेळगांव शारांत चोरयो जावप चालूच आसा. फकत २४ वरांनी हांगा वट्ट ९ घरां फोडल्यां आनी चोरयेच्यो घडणुको घडिल्ल्यान बरोच बोवाळ निर्मा जाला. हातूंत सुमार ३० लाखां परस चड मोलाचें सामान आनी पयशे चोरांनी चोरल्यात.
हे विशीं चड म्हायती प्रमाण, टिळकवाडी पुलीस स्टेशनाचे हद्दींत मुरिगेप्पा मरळी हांच्या बंद घराचें कुलूप तोडून चोरांनी १०.८७ लाख रुपयांच्यो भांगरा वस्ती आनी पयशे चोरले. तेच प्रमाण कॅम्प पुलीस हद्दींतल्या गणेशपूरा शिवराम भट हांच्या घरांतल्यान ९.७८ लाख रुपयांचें सामान चोरी जालें.
आनी एके म्हायती प्रमाण, होन्निहाळ भागांतल्या भारती सोलबक्कनाचेर हांच्या घरांतल्यान ६४ हजार रुपयांचें सामान चोरलें. खडेबाजार पुलीस स्टेशनाचे हद्दींत एकेच रातीक लक्ष्मण वाघमोडे, शंकर चव्हाण आनी दिनेश कांबळे हांच्या घरांनी चोरांनी प्रवेश करून वट्ट पांच हजार, एक हजार आनी एक हजार रुपया चोरले. मजगतीं शाहूनगर भागांतल्यान एक दुचाकी चोरी जाली. ह्या प्रकरणांत एपीएमसी पुलीस स्टेशनांत गुन्यांव दाखल जाला. दुसरी घडणूक रहदारी पुलीस स्टेशनाचे हद्दींत घडली, एक दुचाकी चोरी जाली.
नागरीक भियेंल्यात
ह्या सगल्या घडणुकांची नोंद संबंदीत पुलीस स्टेशनांत केल्ल्यान तपास सुरू आसा. वाडपी चोरयेच्या घडणुकांक लागून नागरिकां मदीं भंयाचें वातावरण निर्माण जालां. हाका लागून पुलीस यंत्रणेच्या कार्यक्षमतेचेरूय प्रस्न निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
