भांगरभूंय | प्रतिनिधी
BeLEX 2026त मानेस्तांनी मारलो उलो
बेळगांव: बेळगांव आनी गोंय हांचे मदलें आंतरराज्य सहकार्य तशेंच एक घटमूट आनी एकसंघ उद्देगीक समुदाय ह्या दोनूय प्रदेशांच्या अर्थवेवस्थेचे वाडी खातीर गरजेचो आसा, अशें मत तीन दिसांच्या उद्देगीक आनी वेपार प्रदर्शन BeLEX 2026च्या उक्तावणा वेळार मानेस्तांनी उक्तायलें. हें प्रदर्शन काल (मंगळारा) सुरू जालें.
बेळगांव चेंबर ऑफ कॉमर्स अॅण्ड इंडस्ट्रीज (बीसीसीआय) वतीन उद्यमबाग हांगा फावंड्री क्लस्टर वाठारांत आयोजीत केल्ल्या ह्या प्रदर्शनाक लागून प्रादेशीक पांवड्यार विवीध घटकां मदीं सहकार्य वाडीक लागलां.
गोवा चेंबर ऑफ कॉमर्स अॅण्ड इंडस्ट्रीज (जीसीसीआय)च्यो अध्यक्ष प्रतिमा धोंड हांणी बेळगांव आनी गोंय हांचे मदीं उद्देग आनी वेपार मळार चड सहकार्याची गरज उक्तायली. संवसारीक पर्यटन केंद्र म्हूण वळख आशिल्ल्या गोंयांत उद्देगीक मळारूय गतीन उदरत जायत आसा. भुगोलीक रितीन लागीं, अर्थीक पुरकताय आनी जोडणी हाका लागून बेळगांव आनी गोंय हांचे मदीं सैमीक सुसंवाद आसा.
BeLEX सारके माचयेक लागून आंतरप्रादेशीक भागिदारी, ज्ञानाचें दिवप घेवप आनी पुरवण सांखळीची घटाय सादूंक मेळटा. गोंय आनी बेळगांवांतल्या उद्देगांनी एकठांय येवन विवीध मळार नव्यो संदी निर्माण करूंक शकतात. अर्थीक नदरेन सक्षम, टिकावू आनी सर्वसमावेशक उद्देग उबारपाचेर भर दिवंक जाय अशेंय तांणी म्हणलें.
बेळगांवां सर्वांगीण उदरगत जायत आसली तरी सरकारी तेंक्याच्या उणावाक लागून उद्देगीक वाड अपेक्षीत अशी गतीन जाल्ली ना. उद्देगपतींनी एकठांय येवन आनी शक्त दाखयली ना जाल्यार सरकार प्रतिसाद दिवचें ना आनी विकास फक्त हुबळी- धारवाड मेरेनूच मर्यादीत उरतलो अशें आमदार अभय पाटील हांणी सांगलें.
बेळगांवां आंतरराष्ट्रीय विमानतळ उबारपाचे यत्न सुरू आसात. उद्यमबाग हो शाराच्या उद्देगीक सामर्थ्यांचो कणो आसा अशेंय तांणी मुखार उलयतना म्हणलें.
नामनेचे उद्देगपती जयंत हुंबरवाडी हांणी अशा प्रदर्शनांचें नियमीत आयोजन करपाची गरज उक्तायली. हुबळी- धारवाड- बेळगांव उद्देगीक पट्ट्यांतलो असमतोल अधोरेखीत करून तांणी म्हणलें, भोवराष्ट्रीय कंपनींक थळाव्या उद्देगां परस अदीक प्राधान्य दितात. आमी रोजगार निर्माण करतात आनी करूय भरतात. ताका लागून सरकारा मुखार एकठांय येवन आवाज काडपाची गरज आसा अशें तांणी म्हणलें.
महाराष्ट्र जैन अल्पसंख्याक वित्त विकास म्हामंडळाचे अध्यक्ष ललीत गांधी हांणी अशा प्रदर्शनांक लागून नव्या उद्देजकांक प्रेरणा मेळटा. पूण संस्थात्मक फाटबळाचो उणाव आशिल्ल्याची खंत तांणी उक्तायली.
85 परस अदीक स्टॉल्स आशिल्ल्या ह्या प्रदर्शनांत विवीध मळा वेल्या उद्देजकांनी उमेदीन वांटो घेतलो. फुकट प्रवेश आनी फुडल्या दोन दिसांत जावपी चर्चासत्रांक लागून BeLEX 2026 बेळगांवच्या उद्देगीक परिसंस्थेक नवे चैतन्य दितले अशी आस्त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
