भांगरभूंय | प्रतिनिधी
दंड घालचे परस बेळगांवांतले येरादारीची परिस्थिती सुदारपाचेर चड लक्ष : बोरसे
भांगरभूंय । लुईस रॉड्रीग्स
बेळगांव : गोंयकारांक आनी बेळगांवा प्रवास करपी हेर सगळ्या प्रवाशांनी शारांत सुरक्षीत आनी सुटसुटीत प्रवास करचो असो भरवसो बेळगांवचे पुलीस आयुक्त भूषण गुलाबराव बोरसे हांणी दिलो. बेळगांव प्रिंट मिडिया असोसिएशनान आयोजीत केल्ल्या ‘मीट द प्रेस’ कार्यावळींत मिडियाक संबोधीत करतना बोरसे हांणी सांगलें, नागरी सुरक्षीतताय वाडोवपा खातीर, येरादारीचें बरें तरेन वेवस्थापन करपा खातीर आनी मादक पदार्थ आनी सायबर गुन्यांवांचेर खर कारवाय करपा खातीर एक रोड मॅप तयार केलां.
येरादारीची अंमलबजावणी आतां शास्त्रीय रितीन सुरू आसा अशें सांगून पुलिसांनी येरादारी हालचालींचो आनी रस्त्याच्या वापराचो शारभर सर्वे करपा खातीर गोगटे इन्स्टिट्यूट ऑफ टेक्नॉलॉजी (जीआयटी) आनी बेंगळुरूंतल्या एजन्सी कडेन एक टाय अप केला अशें ताणीं सांगलें.
गोंय आनी महाराष्ट्रांतल्यान बेळगांवा येवपी वाहनधारकांक हांगाचे ट्राफिक पुलीस टार्गेट करतात ही गजाल तांचे नदरेक हाडून दिले उपरांत तांणी सांगलें, सध्या वाहन तपासणी उणी केल्या, आनी उल्लंघन केल्यार ऑनलायन दंड जारी करतात. वसुली रेव्ह्न्यू परस हांव बंदोबस्त आनी कायदो-सुव्यवस्था आनी सुरक्षीत आनी सुटसुटीत येरादारीक अधिक म्हत्व दिता. बेळगांव वन केंद्रां वरवीं नागरिकांक बेगिनूच दंड भरपाक मेळटलो अशें तांणी सांगलें.
केएसआरटीसी आनी ट्रक चालक संघटनां कडेन लेगीत बसका जाल्या, आनी मुखेल चेक पॉयंट हांची लेगीत म्हायती घेतल्या अशें बोरसे हांणी सांगलें. रत्यांचेर जाल्ली फोंडकुलां बेगोबेग दुरुस्ती करपा खातीर त्या त्या खात्यांक पयलींच पत्रां धाडल्यांत कारणा फोंडकुलांचो येरादारीचेर परिणाम जाता. तेच भाशेन सायबर गुन्यांवांत भिरांकूळ वाड जाल्ल्याचो हुस्को उक्तायतना बोरसे हांणी नागरिकांक सादूर रावपाचो उलो मारलां.
ऑनलायन फटवणूक जाल्यार ते विशीं म्हायती दिवपाक कळाव करचो न्हय. भलायकी सेवेंतल्या ‘गोल्डन अवर’ प्रमाण सायबर गुन्यांवांतय वेळार पुलिसांक म्हायती दिवप म्हत्वाचें अशें तांणी सांगलें. बळी पडपी लोकांनी हेल्पलायनी वरवीं पुलिसां कडेन संपर्क सादचो वा लागींच्या पुलीस स्टेशनाचेर ही गजाल कळोवची असोय ताणीं सल्लो दिलो. तशेंच लोकांक शिक्षण दिवपा खातीर खाशेली जागृताय मोहीम आंखल्याचेय तांणी सांगलें.
शारभर ड्रग्स आनी गांजा विक्री आड चालू आशिल्ल्या आक्रमक मोहिमे बद्दल लेगीत ताणीं म्हायती दिली. आमच्या यत्नांक लागून ड्रग्स विक्रेत्यांक भंय निर्माण जाला. पूण आमकां समाजाचोय आदार जाय अशें सांगून खास करून शाळेच्या शिक्षकांक आनी आवयंक ड्रग्साच्या दुरुपयोगाक बळी पडपी तरणाट्यांक वळखुपाक मजत करची अशें तांणी सांगलें.
शारांतली 70% पुलीस दळ बंदोबस्ताचे काम करता, ताका लागून चवकशी आनी येरादारी वेवस्थापन अशा हेर कार्यावळीं खातीर उपलब्धताय मर्यादीत आसा अशें आयुक्तान मान्य केलां. हाचेर उपाय काडपा खातीर शारांतल्या सगळ्या पुलीस स्टेशनांक कागाळी नोंदणी बेगीन करपा खातीर अपग्रेड करतले अशें तांणी जाहीर केलें. बायलां आनी विद्यार्थ्यांची सुरक्षीतताय वाडोवपा खातीर शारांतल्या सगळ्या बायलां खातीर आशिल्ल्या चन्नाम्मा फोर्साकय अधिक सक्रिय करतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
