भांगरभूंय | प्रतिनिधी
वाळपई: वाळपय पुलिसांनी बेळगांवच्यान गोंयांत जावपी बिफाची बेकायदेशीर येरादारी उक्तडार हाडली. केरी चेकपोस्टावचेर तपासणे मजगतीं पुलिसांनी सुमार ४०० किलो बेकायदेशीर बीफ जप्त केलें.
आयतारा सकाळीं सुमार ४ वरांचेर ही कारवाय केली. बजरंग दळ आनी गोमाता मोगी कार्यकर्त्यांक बेळगांवच्यान बिफाची येरादारी जावपाची आसा म्हूण म्हायती मेळिल्ली. ते प्रमाण तांणी केरी चेकपोस्टचेर पाळत दवरिल्ली.
कार्यकर्त्यांनी दुबावीत इनोव्हा कार (क्रमांक GA 25 E 6719) चेकपोस्टाचेर आडयली.
ह्या वेळार वाहनांत तीग जाण आशिल्ले, मात तांचे मदल्या दोगांक पळून वचपाक येस आयलें. पुलिसांनी इनोव्हा गाडयेंतल्या सोहील मुबारक बेपारी (27, रा. बेळगांव) हाका वाहना सयत ताब्यांत घेतले. बेपारी हांचे आड पुलिसांनी बेकायदेशीर बीफ येरादारी प्रकरणांत कलम 327 प्रमाण गुन्यांव नोंद केला. जनावरांच्या वैजकी दोतोरांनी घडणुके सुवातेर पळोवणी करून पंचनामो पुराय केला, वाळपय पुलीस ह्या प्रकरणाचो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
