भांगरभूंय | प्रतिनिधी
शेतकी मंत्री रवी नायक हांची लेखी जापेंत म्हायती
भांगरभूंय । प्रतिनिधी
पणजीः फाटल्या तीन वर्सांच्यान शेजारी राज्यांतल्यान येवपी भाजयांचेर निंबून रावपाचें गोंय राज्याचें प्रमाण सेगीत वाडत आसा. तीन वर्सां पयलीं 20 टन भाजयो बेळगांवांच्यान आयात जाताल्यो, आतां हें प्रमाण 25 टनां मेरेन पावलां. भाजयो आयात करपाचे मागणेंत तीन वर्सांत सुमार 5 टनांनी वाड जाल्या, अशी म्हायती शेतकी मंत्री रवी नायक हांणी लेखी जापेंत दिल्या.
फाटल्या तीन वर्सा सावन कितली भाजी शेजारी राज्यांतल्यान गोंयांत आयात जाल्या अशी म्हायती दिवचलचे आमदार प्रेमेंन्द्र शेट हांणी मागिल्ली. हाचेर शेतकी मंत्री रवी नायक हांणी विधानसभेंत लेखी जापेंत म्हायती दिल्या, गोंयांत 2021-22 त बेळगांवच्यान 20,014 टन भाजयो येताल्यो. 2022-23 त हो आंकडो 23,999 टन इतलो पावलो आनी आतां 2023-24 वर्सा हो आंकडो 25,255 टना मेरेन पावला.
कांय भाजयांचेर गोंय सरकार अनुदान दिता. ज्यो अनुदान दिल्ल्यो भाजयो आसात त्यो 2021-22 त 18,568 टन येताल्यो, 2022-23 त 22,361 टन आनी 2023-24 त 23,414 टनाचेर पावल्यो. जाल्यार ज्या भाजयांचेर अनुदान ना त्यो भाजयो 2021-22 त 1,446 टन, 2022-23 त 1,638 टन आनी 2023-24 त 1,821 टनाचेर पावल्यो. सरकार 10 भाजयांचेर अनुदान दिता. तातूंत कांदे, बटाटे आनी टमाट हांची 2021-22 त 14,229 इतली आयात जाताली. आतां 18,428 टन इतली आयात जाता. जाल्यार हेर भाजयो कोबी 2021-22 त 1,153.09 टन आयात जाल्ली, ती आतां 1,487.84 टन मेरेन पावल्या. गाजर 2021-22 त 750.67 टन आयात जातलो तो आतां 916.68 मेरेन पावला. बेळगांवच्यान फक्त भेंडे आनी हरवी मिरसांगेची मागणी देंवल्या.
29 तले गोंयचे 11 पुरवणदार
गोंयाक 29 पुरवणदार भाजी पुरवण करतात, तातूंतले 11 गोंयचे पुरवणदार आसात, जाल्यार 18 जाण बेळगांवचे. ज्यो भाजयो भायल्या राज्यांतल्यान हाडटात ताचें गोंयांत उत्पन्न घेवपा खातीर मातयेची सुदारणा आनी ताचें अपग्रेडींग करप चालू आसा. गोंयांत भाजयो रोवपाक उर्बा दिवपा खातीर राज्य पांवड्यार कृशी मेळावो घडोवन हाडून तातूंत विविध प्रात्यक्षिकां आनी सत्रां दवरिल्लीं. गांवठी, हायब्रीड आनी विदेशी भाजयांचें प्रदर्शन घडोवन हाडिल्लें, अशी म्हायती शेतकी मंत्री रवी नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
