भांगरभूंय | प्रतिनिधी
म्हापश्यां गोवा कॅना वतीन जनजागृती
भांगरभूंय । प्रतिनिधी
म्हापशें: बेब्यांची अंदाधूंद हत्या बंद करपाची गरज आसा. लोकांनी बेब्यांचें मांस खावप बंद करपाक जाय, असो उलो गोवा कॅन संस्थेन म्हापश्यां आयोजीत बेबे वाटयात जनजागृती कार्यावळी वरवीं मारला.
मलेरिया जागरुकता सप्तकाचो एक वांटो म्हूण बेबे वाचयात दिसा निमतान ही जागृती गोवा कॅनान म्हापश्यां सरकार संकुलाच्या वाठारांत आयोजीत केल्ली. 25 एप्रील ते 1 मे मेरेन मलेरिया जागृती सप्त मनयतात. ताचोच एक वांटो म्हूण गोवा कॅना वतीन वेगवेगळ्यो जनजागृतीच्यो कार्यावळी आयोजीत केल्यात.
संस्थेच्या आपवावुरप्यांनी तकटे उबारले तशेंच लोकांक म्हायती पत्रकां वांटलीं. बेब्यांक मारप हो लेगीत अन्न सांखळे आड पर्यवरणीय गुन्यांव आसा. ताका लागून लोकांनी पर्यावरणा विशीं जागरूक जावन बेब्यांच्या मांसाक न्हयकारप गरजेचें आसा, अशेंय संस्थेच्या आपवावुरप्यांनी ह्या वेळार सांगलें.
बेब्यांक रानवटी जीव (संरक्षण) कायद्या खाला संरक्षण दितात. बेब्यांक धरप, विकप, मारप वा मांस खांवप हे कायद्याचे तजविजींचें उल्लंघन थारता. ह्या प्रकरणांत रान खात्याच्या अधिकाऱ्यां कडल्यान खटले दाखल जाले जाल्यार संबंदिताक तीन वर्सांची बंदखण आनी 25 हजार रुपयांच्या दंडाचे ख्यास्तीची तजवीज आसा. ही म्हायती अशा जनजागृती कार्यावळीच्या माध्यमांतल्यान संस्था दर वर्सा लोकांक दिवन जागरुकताय करता, अशी म्हायती संस्थेचे समन्वयक रोलंड मार्टीन्स हांणी दिली. बेब्यांच्या खूबशा प्रजातींच्या मिलनाचो मोसम आशिल्ल्या पावसाळ्यांत, गोंयांतल्या खूबशा गांवांनी देशी- विदेशी पर्यटकांक जंपींग चिकन म्हूण रॅस्टोरंण्टांनी वेवसायीक विक्री करपाच्या उद्देशान बेब्यांची हत्या करतात. हे संबंदांत गोवा कॅनान रान खात्याक निवेदन सादर करून पावसाळ्यांत जनजागृती आनी कृती मोहीम चालीक लावपाची विनवणी करतले. जे ह्या गुन्यांवांत वांटेकार जातले, तांकां ही एक खर शिटकावणी आसतली, अशें मार्टीन्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
