भांगरभूंय | प्रतिनिधी
फोंडें : फोंडेंच्या तळें, दुर्गाभाट वाठारांत रस्ताद सुण्यांनी एके देड वर्साचे चलयेचेर हल्लो केलो. हातूंत त्या सानुल्याक मरण आयलें. तिका गंभीर जखमी अवस्थेंत हॉस्पिटलांत व्हेली, मात उपचार सुरू जावचे पयलींच तिका मरण आयलें.
नेमकें प्रकरण कितें?
हें चली मूळ उसगांवचें. मात काल सांजेवेळार तें आपले आवय वांगडा मामाल्या घरा रावपाक आयिल्लें. आयज सकाळीं स वरांचेर घरांत सान्न भोंवडावपा खातीर घरच्यांनी घराचें दार उगडिल्लें. उक्तें आशिल्लें दार पळोवन तें सानुलें खेळटां खेळटां घरांतल्यांचो दोळो चुकयत रस्त्यार पावलें. थंय रस्त्यार आशिल्ल्या सुण्यांनी ते चलयेचेर हल्लो केलो. ह्या हल्ल्यान तें चली पुराय रक्तान माखिल्लें. ताका तेच अवस्थेंत हॉस्पिटलांत व्हेलें. मात उपचार सुरू जावचे पयलींच ताका मरण आयलें. सध्या ताची कूड पोस्टमार्टमा खातीर व्हेल्या.
हे विशीं मेळिल्ले चड म्हायती प्रमाण, जंय ही घडणूक घडल्या थंय लोक कोयर उडयतात. हांगा बरींच रस्ताद सुणीं खाण सोदपाक येतात. सध्या हे घडणुकेक लागून वाठारांत बरोच बोवाळ निर्माण जाला. नागरिकांनी तिडक उक्तायत, रस्ताद सुण्यांचेर नियंत्रण हाडपा खातीर प्रशासनान खर उपाय काडचे अशी मागणी तांणी केली.
रस्ताद सुण्यांची समस्या वाडटा
गोंयांत रस्ताद सुण्यांची समस्या बरीच गंभीर आसा. रस्ताद सुण्यांच्या हल्ल्यांक लागून थळावे नागरीक आनी पर्यटकूय बरेच भियेल्यात. अंदूंच्या जानेवारी म्हयन्यांतूच १,७८९ सुणे चाबिल्ल्याचीं प्रकरणां नोंद जाल्यांत. म्हळ्यार ह्या म्हयन्याक रस्ताद सुणीं दर दिसा सरासरी ५७ जाणांक चावल्यांत. ऑगस्ट २०२४ वर्सा हणजुण्यां एका ७ वर्सां पिरायेच्या चल्याक पिटबूल सुण्याच्या हल्ल्यांत मरण आयिल्लें. गोंय सरकाराने पिटबुल आनी रॉटवायलर आक्रमक जातींच्या सुण्यांचेर बंदी घालपाचो निर्णय घेतला. तशेंच सध्या तांच्या धनयांक तांच्या सुण्यांची नोंदणी करपाचे आदेश दिल्या.
गोंयांत सध्या सुमार ५६,००० रस्ताद सुणीं आसात. बाणावले, मोबोर, ताळगांवां, शिवोले, केळशी वाठारांत रस्ताद आनी पोशिल्ल्या सुण्यांच्या हल्ल्याक लागून ह्यान पयलीं जायते जाण जखमी जाल्यात. मजगतीं फोंडें पुलीस स्टेशनाचे निरीक्षक विजयकांत कवळेंकार हांच्या मार्गदर्शना खाला, पुलीस उपनिरीक्षक सुशांत गांवकार ह्या प्रकरणाचो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
