बेतोड्यां श्रीगणेश देवळांत गणेश जयंती सुवाळो

भांगरभूंय | प्रतिनिधी

बोरये ‘गृहिणी नंबर वन’ अभिनव सांस्कृतीक कार्यावळीचें आयोजन

फोंडें: बेतोड्यां श्रीगणेश देवळाचो सवो वर्धापन दीस सुवाळो आनी गणेश जयंती विवीध धर्मीक आनी सांस्कृतीक कार्यावळींनी मनयतले. सविस्तर कार्यावळी प्रमाण शुक्रारा 31 जानेवारीक सकाळीं 6.30 वरां सावन धर्मीक विधींक सुरवात जातली. दनपारां 1 वरांचेर महाप्रसाद जातलो. सांजवेळा 4 वरांचेर भजन, 6.30 वरांचेर पालखी सुवाळो, आरती, पावणी, तिर्थप्रसाद जातलो. त्याच दिसा दनपारां 2 ते 5 वरां मजगतीं रांगोळी सर्त जातली. सांजवेळा 6 वरांचेर इनामां भेटवण आनी भोवमान सुवाळो जातलो. आदले राज्यसभा खासदार विनय तेंडुलकार ह्या दिसाचे येजमान आसतले.

शेनवार 1 फेब्रुवारी दिसा श्रीगणेश जयंती आनी विनायक चतुर्थी मनयतले. सकाळीं श्रीगणेश म्हापुजा, दनपारां 12 वरांचेर गणेश जल्म उपरांत तिर्थप्रसाद आनी महाप्रसाद जातलो. दनपारां 4 वरांचेर भजन, 6.30 वरांचेर पालखी आनी उपरांत आरती, गाराणें, पावणी आनी तिर्थप्रसाद जातलो. सांजवेळा 5 वरांचेर वेशभुशा सर्त जातली. डॉ. केतन भाटीकार ह्या दिसाचे येजमान आसतले.

भाविकांनी कार्यावळीक हाजीर रावन सोबा हाडची अशें आवाहन समितीचे अध्यक्ष भिका केरकार हांणी केलां.

नागेशीं गणेश जयंती

नागेशीं श्रीनागेश महारुद्र संस्थानांत गणेश जयंती उत्सव 1 फेब्रुवारी दिसा व्हड उमेदीन मनयतले. ते निमतान सकाळीं धर्मीक विधी, अभिषेक, विनायक चतुर्थी, दनपारां 12 वरांचेर गणेश जयंती, आरती, तिर्थप्रसाद जातलो.

सांजवेळा 6.30 वरांचजेर सचीन दाते हांची भजनाची कार्यावळ जातली. रातच्या 8 वरांचेर गणपती पालखी, श्रीनागेश महारुद्र शिबिकोत्सव मिरवणूक जातली. सगले म्हाजन, कुळावी, भक्तगण आनी ग्रामस्थ हांणी व्हड संख्येन हाजीर रावन तिर्थप्रसादाचो लाव घेवचो अशें संस्थानाचे अध्यक्ष दामोदर बाळकृष्ण भाटकार हांणी कळीत केलां.

बोणबाग बेतोड्यां गणेश जयंती

बोणबाग बेतोड्यां श्रीगजानन देवस्थानांत गणेशत जयंती उत्सव शेनवार 1 वेर व्हड उमेदीन मनयतले. ते निमतान सकाळीं धर्मीक विधी, दनपारां एक वरांचेर आरती आनी महाप्रसाद जातलो. सांजवेळा 6.30 वरांचेर विवीध सांस्कृतीक कार्यावळी जातल्यो अशी म्हायती देवस्थान समिती वतीन दिली.

बोरये सांस्कृतीक कार्यावळ

बोरये हौशी महिला गटां वतीन बायलां खातीर खेळ आनी उखाण्याचेर आदारीत ‘गृहिणी नंबर वन’ ह्या अभिनव सांस्कृतीक कार्यावळीचें आयोजन शेनवारा 1 वेर सांजवेळा चार वरांचेर बोरयेच्या श्रीगोपाळकृष्ण देवळांत केलां. कार्यावळीचो समारोप सामुहीक हळद कुकमाच्या विवीध कार्यावळीन जातलो.

मानेस्तांचे हाजिरेंत जावपी हे कार्यावळीक बायलांनी व्हड संख्येन हाजीर रावचें अशें आवाहन संस्थेच्यो पदाधिकारी शर्मिला प्रभुदेसाय हांणी केलां.